ധ്രുവ് സർജ നായകനായി എത്തുന്ന ബഹുഭാഷാ ചിത്രം ‘കെഡി: ദ ഡെവിൾ’ (KD: The Devil) വലിയ നിയമനടപടികൾ നേരിടുന്നു. ചിത്രത്തിൽ നോറ ഫത്തേഹി അഭിനയിച്ച ഗാനത്തിലെ വരികൾ അശ്ലീലമാണെന്ന പരാതിയെത്തുടർന്ന് കേന്ദ്ര വാർത്താവിനിമയ മന്ത്രാലയം ഗാനത്തിന് നിരോധനം ഏർപ്പെടുത്തി. ഉത്തരേന്ത്യൻ സംസ്ഥാനങ്ങളിൽ നിന്നുൾപ്പെടെ ശക്തമായ ജനരോഷം ഉയർന്ന പശ്ചാത്തലത്തിലാണ് സർക്കാരിന്റെ ഈ അടിയന്തര ഇടപെടൽ. അർജുൻ ജന്യ ഈണം നൽകിയ ഈ ഗാനത്തിനെതിരെ വരികളിലെ ദ്വയാർത്ഥ പ്രയോഗങ്ങളും സ്ത്രീ വിരുദ്ധതയും ചൂണ്ടിക്കാട്ടിയാണ് പ്രതിഷേധം ശക്തമായത്.
അഭിപ്രായസ്വാതന്ത്ര്യത്തിന്റെ മറവിൽ സാമൂഹിക സാംസ്കാരിക മൂല്യങ്ങളെ തകർക്കുന്ന പ്രവണതകൾ അംഗീകരിക്കാനാവില്ലെന്ന് കേന്ദ്രമന്ത്രി അശ്വനി വൈഷ്ണവ് വ്യക്തമാക്കി. പ്രമുഖ ഗായകൻ അർമാൻ മാലിക് ഉൾപ്പെടെയുള്ള ചലച്ചിത്ര രംഗത്തെ പ്രമുഖരും ഗാനത്തിന്റെ നിലവാരത്തെ വിമർശിച്ച് രംഗത്തെത്തിയിരുന്നു. സഞ്ജയ് ദത്ത്, ശിൽപ ഷെട്ടി തുടങ്ങിയ പ്രമുഖ താരങ്ങൾ അഭിനയിക്കുന്ന ഈ ബിഗ് ബജറ്റ് ചിത്രം ഏപ്രിൽ 30-ന് റിലീസ് ചെയ്യാനിരിക്കെയാണ് നിലവിലെ ഈ പ്രതിസന്ധി.