പുതുമുഖ സംവിധായകർക്ക് കൈകൊടുക്കുന്ന തന്റെ പതിവ് ശൈലിയിലൂടെ 2025-ൽ മമ്മൂട്ടി വീണ്ടും വിസ്മയിപ്പിക്കുകയാണ്. ഈ വർഷം അദ്ദേഹത്തിന്റേതായി പുറത്തിറങ്ങിയ മൂന്ന് ചിത്രങ്ങളിൽ ‘ബസൂക്ക’, ‘ഡൊമിനിക് ആൻഡ് ദി ലേഡീസ് പഴ്സ്’ എന്നീ സിനിമകൾക്ക് ബോക്സ് ഓഫീസിൽ പ്രതീക്ഷിച്ച വിജയം നേടാനായില്ലെങ്കിലും, ‘കളങ്കാവൽ’ എന്ന ചിത്രം ആ കുറവ് നികത്തി വലിയ മുന്നേറ്റമാണ് നടത്തുന്നത്. ജിതിൻ കെ. ജോസ് എന്ന നവാഗത സംവിധായകന്റെ കരവിരുതിൽ പിറന്ന ഈ ചിത്രം നിലവിൽ 2025-ലെ ക്ലാസിക് ബ്ലോക്ക്ബസ്റ്റർ എന്ന ഖ്യാതി നേടിക്കഴിഞ്ഞു.
ഡിസംബർ അഞ്ചിന് തിയേറ്ററുകളിലെത്തിയ കളങ്കാവലിന്റെ ഏറ്റവും പുതിയ കളക്ഷൻ റിപ്പോർട്ടുകൾ നിർമ്മാതാക്കളായ മമ്മൂട്ടി കമ്പനി ഇപ്പോൾ ഔദ്യോഗികമായി പുറത്തുവിട്ടിട്ടുണ്ട്. റിലീസ് ചെയ്ത് വെറും 24 ദിവസങ്ങൾ പിന്നിടുമ്പോൾ ആഗോള ബോക്സ് ഓഫീസിൽ നിന്ന് 83 കോടി രൂപയാണ് ചിത്രം വാരിക്കൂട്ടിയത്. മമ്മൂട്ടി ഒരു സീരിയൽ കില്ലറായി എത്തിയപ്പോൾ വിനായകൻ സ്പെഷ്യൽ ബ്രാഞ്ച് ഉദ്യോഗസ്ഥനായി തിളങ്ങിയ ഈ ചിത്രത്തിലെ ഇരുവരുടെയും പ്രകടനം തന്നെയാണ് വിജയത്തിന്റെ പ്രധാന ഘടകം.
ജിതിൻ കെ. ജോസും ജിഷ്ണു ശ്രീകുമാറും ചേർന്ന് തിരക്കഥയൊരുക്കിയ കളങ്കാവൽ മമ്മൂട്ടി കമ്പനിയുടെ ഏഴാമത്തെ നിർമ്മാണ സംരംഭമാണ്. മുജീബ് മജീദിന്റെ സംഗീതവും ഫൈസൽ അലിയുടെ ഛായാഗ്രഹണവും ചിത്രത്തിന് വലിയ കരുത്തായി. മമ്മൂട്ടിയും വിനായകനും തമ്മിലുള്ള തകർപ്പൻ സ്ക്രീൻ പോരാട്ടം പ്രേക്ഷകർ ഇരുകൈയും നീട്ടിയാണ് സ്വീകരിച്ചത്. ദുൽഖർ സൽമാന്റെ വേഫെറർ ഫിലിംസ് വിതരണത്തിനെത്തിച്ച ഈ ചിത്രം ഇപ്പോഴും തിയേറ്ററുകളിൽ മികച്ച പ്രദർശനം തുടരുകയാണ്.