ഐഫോണ് പ്രേമികൾക്ക് ഒരു സന്തോഷ വാര്ത്ത. ആപ്പിളിന്റെ ബജറ്റ്-സൗഹാര്ദ സ്മാര്ട്ട്ഫോണായ ഐഫോണ് 17ഇ (iPhone 17e) 2026 ഫെബ്രുവരിയില് അവതരിപ്പിക്കപ്പെടും എന്നാണ് സ്ഥിരീകരിക്കാത്ത റിപ്പോര്ട്ട്. വിലക്കുറവുണ്ടാകുമെങ്കിലും ഫ്ലാഗ്ഷിപ്പ് ഐഫോണ് 17ന് സമാനമായ ക്യാമറ ഫീച്ചറുകള് ഐഫോണ് 17ഇ-യിലുണ്ടാകും എന്നാണ് സൂചനകള്. ചിത്രങ്ങളുടെ നിലവാരം വര്ധിപ്പിക്കുന്ന പുതിയ സെല്ഫി സെന്സര് ഐഫോണ് 17ഇ-യ്ക്ക് ലഭിക്കുമെന്ന് ലീക്കുകള് അവകാശപ്പെടുന്നു.
ഐഫോണ് 17 മോഡലിലേതിന് സമാനമായ സെല്ഫി ക്യാമറ ഐഫോണ് 17ഇ-യ്ക്ക് ലഭിക്കുമെന്നാണ് അനലിസ്റ്റായ ജെഫ് പറയുന്നത്. മുമ്പ് 12-മെഗാപിക്സല് ഫ്രണ്ട് ക്യാമറയുണ്ടായിരുന്ന സ്ഥാനത്ത് ആപ്പിള് ഈ വര്ഷമാണ് ഐഫോണ് 17 സ്റ്റാന്ഡേര്ഡ് മോഡലില് 18 എംപി സെല്ഫി സെന്സര് ഉള്ക്കൊള്ളിച്ചത്. ആപ്പിളിന്റെ അഫോര്ഡബിള് സ്മാര്ട്ട്ഫോണ് എന്ന വിശേഷണമുള്ള ഐഫോണ് ഇ മോഡലിലേക്കും സമാന 18-മെഗാപിക്സല് ക്യാമറ കൊണ്ടുവരുമെന്ന് ജെഫ് പറയുന്നു. ഫോണ് തിരിക്കാതെ തന്നെ വെര്ടിക്കല്, ഹൊറിസോണ്ടല് സെല്ഫികളെടുക്കാന് പാകത്തിലുള്ളതായിരിക്കും ഐഫോണ് 17ഇ-യിലെ ഈ 18 എംപി സെന്സര്. പുതിയ എഐ19 ചിപ്പ്, ഡൈനാമിക് ഐലന്ഡ് തുടങ്ങിയ ഡിസൈന്, ഹാര്ഡ്വെയര് അപ്ഗ്രേഡുകളും ഐഫോണ് 17ഇ-യില് വന്നേക്കും.
ഐഫോണ് 17ഇ മുന്ഗാമിയിലേത് പോലുള്ള 60 ഹെര്ട്സ് റിഫ്രഷ് റേറ്റോടെയുള്ള 6.1 ഇഞ്ച് ഒഎല്ഇഡി ഡിസ്പ്ലെയാണ് അവതരിപ്പിക്കുക എന്നാണ് ലീക്കുകള് സൂചിപ്പിക്കുന്നത്. സിംഗിള് 48-മെഗാപിക്സല് റിയര് ക്യാമറയിലും മാറ്റമുണ്ടായേക്കില്ല. എന്നാല് ക്യാമറ പ്രകടനത്തില് ചില മെച്ചപ്പെടുത്തലുകള് പ്രതീക്ഷിക്കുന്നു. 4,000 എംഎഎച്ച് ബാറ്ററി കരുത്തില് 20 വാട്സ് വയേര്ഡ് ഫാസ്റ്റ് ചാര്ജിംഗായിരിക്കും. എന്നാല് എല്ലാ ആപ്പിള് ഉത്പന്നങ്ങളെയും പോലെ ലോഞ്ച് സമയത്ത് മാത്രമേ ഐഫോണ് 17ഇ-യുടെ മുഴുവന് സവിശേഷതകളും കമ്പനി പുറത്തുവിടുകയുള്ളൂ.