ലൈംഗികാരോപണ വിവാദത്തിൽപെട്ട യോർക്ക് ഡ്യൂക്ക് ആൻഡ്രു രാജകുമാരനെതിരായ കർശന നടപടി ആരംഭിച്ച് ബ്രിട്ടനിലെ ചാൾസ് രാജാവ്. ആൻഡ്രൂ രാജകുമാരന്റെ രാജകീയ പദവികളും ബഹുമതികളും പിൻവലിക്കാനാണ് ചാൾസ് രാജാവിന്റെ തീരുമാനം. ആൻഡ്രുവിനെ കൊട്ടാരത്തിൽനിന്ന് പുറത്താക്കാനും ചാൾസ് രാജാവ് തീരുമാനിച്ചു. ഇതിന്റെ നടപടികൾ ആരംഭിച്ചെന്നാണ് റിപ്പോർട്ട്.
വ്യാഴാഴ്ച പുറത്തിറക്കിയ പത്രക്കുറിപ്പിലാണ് രാജകുമാരന്റെ പദവികൾ റദ്ദാക്കാനുള്ള ഔദ്യോഗിക നടപടികൾ ആരംഭിച്ചതായി കൊട്ടാരം സ്ഥിരീകരിച്ചത്. ഇനി മുതൽ ആൻഡ്രു “ആൻഡ്രു മൗണ്ട്ബാറ്റൻ വിൻഡ്സർ” എന്ന പേരിലാണ് അറിയപ്പെടുക.
എപ്സ്റ്റൈൻ ബന്ധം: വിവാദത്തിന്റെ വേരുകൾ
യുഎസ് ലൈംഗിക കുറ്റവാളി ജെഫ്രി എപ്സ്റ്റൈൻ എന്നയാളുമായുള്ള ബന്ധമാണ് ആൻഡ്രുവിന്റെ വീഴ്ചയ്ക്ക് തുടക്കമായത്.
അദ്ദേഹത്തിനെതിരെ ലൈംഗിക പീഡനാരോപണങ്ങൾ ഉയർന്നതിനെ തുടർന്ന് ജനപ്രീതി കനത്ത ആഘാതം നേരിട്ടിരുന്നു. വെർജീനിയ ജുഫ്രേ എന്ന സ്ത്രീയുമായുള്ള ലൈംഗികബന്ധവും തുടർന്നുള്ള കോടതി വ്യവഹാരവും അദ്ദേഹത്തിന്റെ ജനപ്രീതിക്ക് മങ്ങലേൽപിച്ചിരുന്നു. 2019-ൽ BBC-യോട് നൽകിയ അഭിമുഖം അദ്ദേഹത്തിന് തിരിച്ചടിയായി; പൊതുജനരോഷം ഉയർന്നതോടെ രാജകീയ ചുമതലകളിൽ നിന്നും അന്ന് തന്നെ പിൻവാങ്ങേണ്ടി വന്നിരുന്നു.
കൊട്ടാരത്തിൽനിന്ന് പുറത്ത് – സാൻഡ്രിങ്ങാമിലേക്കു താമസം
കൊട്ടാരത്തിലെ താമസാവകാശം പിൻവലിച്ചതിനാൽ ആൻഡ്രുവിന് ഉടൻ സാൻഡ്രിങ്ങാം എസ്റ്റേറ്റിലെ സ്വകാര്യ വസതിയിലേക്ക് മാറേണ്ടി വരും.
താമസാവകാശം തിരികെ കൊടുക്കണമെന്നും വ്യക്തിപരമായ ജീവിതത്തിലേക്കു മാറണമെന്നും കൊട്ടാരം നിർദേശിച്ചു.
താൻ നിരപരാധിയാണെന്ന് ആൻഡ്രു
ആൻഡ്രു രാജകുമാരൻ ആരോപണങ്ങളെ നിഷേധിച്ചെങ്കിലും രാജകുടുംബത്തിന്റെ പ്രതിഛായ സംരക്ഷിക്കാനായി ഈ തീരുമാനം ഒഴിവാക്കാനായില്ലെന്ന് കൊട്ടാരം വ്യക്തമാക്കി.
ഇതിനൊപ്പം മുൻഭാര്യ സാറാ ഫെർഗൂസനും പ്രഭ്വിപദവി നഷ്ടപ്പെടും.
മറ്റ് ആരോപണങ്ങൾ
ഒരു ചൈനീസ് ചാരനുമായുള്ള ബിസിനസ് ഇടപാടുകളും ആൻഡ്രുവിനെതിരായ വിവാദങ്ങൾക്ക് കൂടുതൽ തീ ചേർത്തിരുന്നു.
മുമ്പ് ചില പദവികൾ സ്വമേധയാ ഉപേക്ഷിച്ചിരുന്നെങ്കിലും “പ്രിൻസ്” എന്ന പദവി നിലനിന്നിരുന്നു — അതും ഇനി അവസാനിക്കുന്നു.
സിഎൻഎൻ റിപ്പോർട്ട്
സിഎൻഎൻ റിപ്പോർട്ട് ചെയ്യുന്നതനുസരിച്ച്, ആൻഡ്രു ഉടൻ സാൻഡ്രിങ്ങാം എസ്റ്റേറ്റിലേക്ക് മാറാനാണ് തീരുമാനം.
ചാൾസ് രാജാവിന്റെ നടപടിയിലൂടെ ബ്രിട്ടീഷ് രാജകുടുംബം “ശുദ്ധീകരണ നീക്കം” ആരംഭിച്ചുവെന്ന വിലയിരുത്തലാണ് അന്താരാഷ്ട്ര മാധ്യമങ്ങളിൽ.