തെന്നിന്ത്യൻ സൂപ്പർതാരം വിജയ് സേതുപതിയുടെ മകൻ സൂര്യ സേതുപതി ആദ്യമായി നായകനായെത്തുന്ന ചിത്രം ‘ഫീനിക്സ്’ റിലീസിനൊരുങ്ങുകയാണ്. നവംബർ ഏഴിന് ചിത്രം പ്രേക്ഷകരിലേക്ക് എത്തുന്ന പശ്ചാത്തലത്തിൽ, മകൻ്റെ അരങ്ങേറ്റത്തെക്കുറിച്ച് മനസ്സുതുറന്നിരിക്കുകയാണ് വിജയ് സേതുപതി.
ചിത്രത്തിൻ്റെ പ്രീ-റിലീസ് ഇവൻ്റിൽ സംസാരിക്കവെ, സംവിധായകനും പ്രശസ്ത ആക്ഷൻ കൊറിയോഗ്രാഫറുമായ അനൽ അരശുവിനോട് വിജയ് സേതുപതി നന്ദി പ്രകടിപ്പിച്ചു. ഷാരൂഖ് ഖാൻ ചിത്രം ‘ജവാൻ്റെ’ ചിത്രീകരണത്തിനിടെയാണ് താൻ അനൽ അരശുവിനെ കണ്ടുമുട്ടിയതെന്നും വിജയ് പറഞ്ഞു.
കഥ വിവരിച്ച ശേഷം മകനെ ഈ സിനിമയിൽ അഭിനയിക്കാൻ അനുവദിക്കാമോ എന്ന് അനൽ അരശ് ചോദിച്ചപ്പോൾ, “നിങ്ങളും അവനും സംസാരിക്കൂ” എന്നായിരുന്നു തൻ്റെ മറുപടി എന്ന് വിജയ് സേതുപതി ഓർത്തെടുത്തു. സിനിമ കണ്ടപ്പോൾ തനിക്ക് അതിയായ സന്തോഷം തോന്നിയെന്നും, ഇത് മകന് ലഭിച്ച ഒരു മികച്ച തുടക്കമാണ് എന്നും അദ്ദേഹം പറഞ്ഞു.
സൂര്യക്ക് മാസ് സിനിമകളോട് താത്പര്യം
“മകൻ സൂര്യക്ക് ചെറുപ്പം മുതലേ ആക്ഷൻ സിനിമകൾ ചെയ്യണമെന്ന് ആഗ്രഹമുണ്ടായിരുന്നു. അവൻ മാസ് സിനിമകളെ ഇഷ്ടപ്പെടുന്ന വ്യക്തിയാണ്. ‘അച്ഛാ നിങ്ങൾ കൂടുതൽ മാസ് സിനിമകൾ ചെയ്യണം’ എന്ന് അവൻ എപ്പോഴും തന്നോട് പറയാറുണ്ടായിരുന്നു,” വിജയ് സേതുപതി പറഞ്ഞു. മകൻ്റെ സ്വപ്നം യാഥാർത്ഥ്യമാക്കിയതിന് സംവിധായകനോടും നിർമ്മാതാവ് രാജലക്ഷ്മിയോടുമുള്ള നന്ദിയും അദ്ദേഹം അറിയിച്ചു.
സൂര്യ സേതുപതിയുടെ ആദ്യ നായക വേഷമാണ് ‘ഫീനിക്സ്’ എങ്കിലും, ‘നാനും റൗഡി താൻ’, ‘സിന്ധുബാദ്’ തുടങ്ങിയ ചിത്രങ്ങളിൽ സൂര്യ മുമ്പ് അഭിനയിച്ചിട്ടുണ്ട്. സം സി.എസ്. സംഗീതസംവിധാനം നിർവ്വഹിക്കുന്ന, തീവ്രമായ ആക്ഷൻ രംഗങ്ങളാൽ സമ്പന്നമായ ‘ഫീനിക്സ്’ എ.കെ. ബ്രേവ്മാൻ പിക്‌ചേഴ്‌സ് ആണ് അവതരിപ്പിക്കുന്നത്.