വരുമാനം കോടികൾ! തെളിഞ്ഞത് 60 കോടി രൂപയുടെ തട്ടിപ്പ്… ബോളിവുഡ് സൂപ്പർ താരത്തിന്റെ ഹോട്ടൽ അടച്ചുപൂട്ടി സീൽ വെച്ച്‌ അധികൃതർ

വഞ്ചനാക്കുറ്റത്തിന് കേസെടുത്തതിന് പിന്നാലെ, ബോളിവുഡ് നടി ശിൽപ ഷെട്ടിയും ഭർത്താവ് രാജ് കുന്ദ്രയും നടത്തി വരുന്ന മുംബൈയിലെ പ്രശസ്ത റെസ്റ്റോറന്റുകളിൽ ഒന്നായ ബാസ്റ്റിയൻ ബാന്ദ്ര അടച്ചുപൂട്ടുന്നു. 60 കോടി രൂപയുടെ തട്ടിപ്പ് കേസിൽ ദമ്പതികൾക്കെതിരെ ആരോപണങ്ങൾ ഉയർന്ന് ദിവസങ്ങൾക്കുള്ളിലാണ് ഈ നീക്കം.

തന്റെ ഇൻസ്റ്റാഗ്രാം സ്റ്റോറിയിലൂടെയാണ് ബാസ്റ്റിയൻ ബാന്ദ്ര അടച്ചുപൂട്ടുമെന്ന് ശിൽപ ഷെട്ടി പ്രഖ്യാപിച്ചത്. “മുംബൈയിലെ ഏറ്റവും പ്രശസ്തമായ സ്ഥലങ്ങളിലൊന്നായ ബാസ്റ്റിയൻ ബാന്ദ്രയോട് വിടപറയുന്ന ഈ ദിനം ഒരു യുഗത്തിന്റെ കൂടി അന്ത്യം കുറിക്കുന്ന ദിവസമാണ്. എണ്ണമറ്റ ഓർമ്മകളും, മറക്കാനാവാത്ത രാത്രികളും, നഗരത്തിന്റെ രാത്രിജീവിതത്തെ രൂപപ്പെടുത്തിയ നിമിഷങ്ങളും ഞങ്ങൾക്ക് നൽകിയ ഒരു വേദി ഇപ്പോൾ അതിന്റെ അന്ത്യത്തിലേക്ക് നീങ്ങുന്നു,” അവർ കുറിച്ചു. കൂടാതെ, ബാസ്റ്റിയൻ അറ്റ് ദി ടോപ്പിൽ തങ്ങളുടെ സേവനങ്ങൾ തുടരുമെന്നും നടി വ്യക്തമാക്കി. റെസ്റ്റോറേറ്റർ രഞ്ജിത് ബിന്ദ്രയുമായി ചേർന്നാണ് ശിൽപ ഷെട്ടി 2016-ൽ ബാസ്റ്റിയൻ ബാന്ദ്ര ആരംഭിച്ചത്.

മുംബൈ ആസ്ഥാനമായുള്ള ബിസിനസുകാരൻ ദീപക് കോത്താരിയുടെ പരാതിയുടെ അടിസ്ഥാനത്തിലാണ് ശിൽപ ഷെട്ടിക്കും രാജ് കുന്ദ്രയ്ക്കുമെതിരെ മുംബൈ പോലീസിൻ്റെ സാമ്പത്തിക കുറ്റകൃത്യ വിഭാഗം (EOW) കേസെടുത്തത്. ബെസ്റ്റ് ഡീൽ ടിവി പ്രൈവറ്റ് ലിമിറ്റഡ് എന്ന കമ്പനിയുടെ പേരിൽ വായ്പയും നിക്ഷേപ ഇടപാടും നടത്തി 60.4 കോടി രൂപ തട്ടിയെടുത്തുവെന്നാണ് ആരോപണം. 2015-നും 2023-നും ഇടയിൽ ബിസിനസ്സ് വികസിപ്പിക്കുന്നതിനായി നിക്ഷേപിച്ച ഈ തുക, ദമ്പതികൾ വ്യക്തിപരമായ ആവശ്യങ്ങൾക്കായി ഉപയോഗിച്ചുവെന്നും പരാതിയിൽ പറയുന്നു.

പരാതി ഉയർന്നതിന് പിന്നാലെ, ശിൽപ ഷെട്ടിയുടെയും രാജ് കുന്ദ്രയുടെയും അഭിഭാഷകനായ പ്രശാന്ത് പാട്ടീൽ ആരോപണങ്ങൾ നിഷേധിച്ചു. ഇത് ഒരു പഴയ സിവിൽ കേസാണെന്നും 2024 ഒക്ടോബറിൽ തന്നെ എൻസിഎൽടി മുംബൈയിൽ തീർപ്പായതാണെന്നും അദ്ദേഹം പറഞ്ഞു. തങ്ങളെ അപകീർത്തിപ്പെടുത്താൻ ലക്ഷ്യമിട്ടുള്ള “അടിസ്ഥാനരഹിതവും ദുരുദ്ദേശ്യപരവുമായ” കേസാണിതെന്നും, ആവശ്യമുള്ള എല്ലാ രേഖകളും സമർപ്പിച്ചതായും അദ്ദേഹം കൂട്ടിച്ചേർത്തു.

ബാസ്റ്റിയൻ ബാന്ദ്രയുടെ അടച്ചുപൂട്ടൽ നടി ശിൽപ ഷെട്ടിയുടെയും കുടുംബത്തിന്റെയും ജീവിതത്തിൽ പുതിയൊരു അധ്യായത്തിന് തുടക്കം കുറിക്കുകയാണ്. ഈ ഐതിഹാസിക റെസ്റ്റോറന്റ് അടച്ചുപൂട്ടിയത് കേസ് നടക്കുന്നതുകൊണ്ടാണോ എന്ന കാര്യത്തിൽ വ്യക്തതയില്ലെങ്കിലും, ഇരുസംഭവങ്ങളും തമ്മിലുള്ള ബന്ധം അഭ്യൂഹങ്ങൾക്ക് വഴിവെച്ചിരിക്കുകയാണ്. EOW നടത്തുന്ന അന്വേഷണത്തിൽ സത്യം എന്താണെന്ന് പുറത്തുവരുമെന്ന് പ്രതീക്ഷിക്കാം.