കപിൽ ശർമ്മയെ ഭീഷണിപ്പെടുത്തി പണം തട്ടാൻ ശ്രമം: ഒരു കോടി രൂപ ആവശ്യപ്പെട്ട പ്രതിയെ അറസ്റ്റ് ചെയ്ത് ക്രൈംബ്രാഞ്ച്

പ്രശസ്ത ഹാസ്യനടനും ടെലിവിഷൻ താരവുമായ കപിൽ ശർമ്മയെ ഭീഷണിപ്പെടുത്തി പണം തട്ടാൻ ശ്രമിച്ച കേസിൽ ഒരാളെ മുംബൈ ക്രൈംബ്രാഞ്ച് അറസ്റ്റ് ചെയ്തു. പശ്ചിമ ബംഗാളിലെ നോർത്ത് 24 പർഗാനാസ് ജില്ലയിൽ നിന്നുള്ള ദിലീപ് ചൗധരി എന്നയാളാണ് അറസ്റ്റിലായത്. കപിൽ ശർമ്മയ്ക്ക് ഭീഷണി സന്ദേശമടങ്ങിയ ഇമെയിൽ അയച്ചതിനാണ് ഇയാളെ കസ്റ്റഡിയിലെടുത്തത്.

കപിൽ ശർമ്മയോട് ഒരു കോടി രൂപ ആവശ്യപ്പെട്ടാണ് ദിലീപ് ചൗധരി ഇമെയിൽ അയച്ചത്. ഗോൾഡി ബ്രാർ, രോഹിത് ഗാദ്ര എന്നീ കുപ്രസിദ്ധ ക്രിമിനൽ സംഘത്തിലെ അംഗമാണെന്ന് സ്വയം പരിചയപ്പെടുത്തിക്കൊണ്ടാണ് ഇയാൾ ഹാസ്യനടനെ ഭീഷണിപ്പെടുത്താൻ ശ്രമിച്ചത്. ഈ ക്രിമിനൽ ശൃംഖലയുമായുള്ള ബന്ധം ചൂണ്ടിക്കാട്ടി കപിൽ ശർമ്മയെ ഭീഷണിപ്പെടുത്താനാണ് ഇയാൾ ശ്രമിച്ചത്.

കപിൽ ശർമ്മയുടെ പരാതിയെത്തുടർന്ന് മുംബൈ പോലീസ് കേസ് രജിസ്റ്റർ ചെയ്യുകയും ഉടൻ തന്നെ അന്വേഷണം ആരംഭിക്കുകയും ചെയ്തു. സൈബർ സെല്ലിന്റെ സഹായത്തോടെ നടത്തിയ അന്വേഷണത്തിലാണ് പ്രതിയായ ദിലീപ് ചൗധരിയെ കണ്ടെത്തിയത്. മുംബൈയിൽ നിന്നുള്ള ക്രൈംബ്രാഞ്ച് സംഘം അവിടെയെത്തി ഇയാളെ കസ്റ്റഡിയിലെടുത്തു.

അതേസമയം അറസ്റ്റിലായ ദിലീപ് ചൗധരിക്ക് ഗോൾഡി ബ്രാറുമായോ രോഹിത് ഗാദ്രയുമായോ യഥാർത്ഥത്തിൽ ബന്ധമുണ്ടോ, അതോ അവരുടെ പേരുകൾ ഉപയോഗിച്ച് പണം തട്ടാനുള്ള ശ്രമം മാത്രമായിരുന്നോ ഇത് എന്നതിലാണ് ഇപ്പോൾ അന്വേഷണം കേന്ദ്രീകരിച്ചിരിക്കുന്നതെന്ന് പോലീസ് ഉദ്യോഗസ്ഥർ സ്ഥിരീകരിച്ചു. സംഭവത്തിന് പിന്നിൽ മറ്റാർക്കെങ്കിലും പങ്കുണ്ടോ എന്നതും പോലീസ് പരിശോധിക്കുന്നുണ്ട്.