ഷണ്‍മുഖന്‍ ഇനി വാട്സാപ്പിലും; സര്‍പ്രൈസ് അപ്‌ഡേഷനുമായി ടീം ‘തുടരും’

മോഹന്‍ലാല്‍ നായകനായി എത്തുന്ന ചിത്രമാണ് തുടരും. തരുണ്‍ മൂര്‍ത്തിയാണ് ചിത്രത്തിന്റെ സംവിധാനം നിര്‍വ്വഹിക്കുന്നത്. ഇപ്പോഴിതാ സിനിമയുടെ റിലീസിന് മുന്നോടിയായി ഒരു സര്‍പ്രൈസ് കൂടി പ്രേക്ഷകരെ തേടി എത്തിയിരിക്കുകയാണ്. വാട്‌സ്ആപ്പില്‍ മംഗ്ലീഷ് കീബോര്‍ഡ് ഉപയോഗിച്ചുകൊണ്ട് തുടരും എന്ന് ടൈപ്പ് ചെയ്താല്‍ ചിത്രത്തിന്റെ സ്‌പെഷ്യല്‍ സ്റ്റിക്കറുകള്‍ ലഭിക്കുമെന്നാണ് ഏറ്റവും പുതിയ അപ്‌ഡേറ്റ്. സിനിമയുടെ നേരത്തെ പുറത്തുവന്ന ട്രെയ്ലറിലുള്ള ഭാഗങ്ങളിലെ ചിത്രങ്ങളാണ് സ്റ്റിക്കറുകളായി ഉപയോക്താക്കള്‍ക്ക് ലഭിക്കുക.

ഏപ്രില്‍ 25 ന് രാവിലെ 10 മണിക്കാണ് സിനിമയുടെ ഫസ്റ്റ് ഷോ ആരംഭിക്കുന്നത്. മോഹന്‍ലാല്‍ തന്നെയാണ് ഇക്കാര്യം സമൂഹ മാധ്യമങ്ങളിലൂടെ അറിയിച്ചതും. ഫാമിലി ഡ്രാമ സ്വഭാവത്തില്‍ ഒരുങ്ങുന്ന തുടരും എന്ന സിനിമയില്‍ ഒരു സാധാരണ ടാക്‌സി ഡ്രൈവറുടെ വേഷത്തിലാണ് മോഹന്‍ലാല്‍ എത്തുന്നത്. നര്‍മ്മ മുഹൂര്‍ത്തങ്ങള്‍ക്കും ഫാമിലി ഇമോഷന്‍സിനും ഒപ്പം അല്പം നിഗൂഢതയും ബാക്കിവെച്ചാണ് സിനിമയുടെ ഇതുവരെയുള്ള അപ്‌ഡേറ്റുകള്‍ പുറത്തുവിട്ടിരിക്കുന്നത്.

തരുണ്‍ മൂര്‍ത്തി സംവിധാനം ചെയ്യുന്ന ചിത്രത്തില്‍ ശോഭനയാണ് നായികാ കഥാപാത്രത്തെ അവതരിപ്പിക്കുന്നത്. മോഹന്‍ലാലും ശോഭനയും 20 വര്‍ഷങ്ങള്‍ക്ക് ശേഷം ഒന്നിക്കുന്ന ചിത്രം കൂടിയാണ് തുടരും. 2004 ല്‍ ജോഷി സംവിധാനം ചെയ്ത ‘മാമ്പഴക്കാല’ത്തിലാണ് ഇരുവരും അവസാനമായി ജോഡികളായത്. 2009 ല്‍ റിലീസ് ചെയ്ത സാഗര്‍ ഏലിയാസ് ജാക്കി എന്ന ചിത്രത്തില്‍ ഇരുവരും ഒരുമിച്ചഭിനയിച്ചിരുന്നു.