തായ്‌പേയില്‍ പ്രദര്‍ശിപ്പിക്കുന്ന ആദ്യ മലയാള സിനിമ; നേട്ടം സ്വന്തമാക്കി ‘എ ആര്‍ എം’

ദ മോഷന്‍ പിക്ചര്‍ ഡെവലപ്‌മെന്റ് ഫൗണ്ടേഷന്‍ R.O.C. യുടെ ഭാഗമായി തായ്‌പേയ് ഗോള്‍ഡന്‍ ഹോഴ്‌സ് ഫന്റാസ്റ്റിക് ഫിലിം ഫെസ്റ്റിവലില്‍ (TGHFF) ല്‍ ‘എ ആര്‍ എം’ (അജയന്റെ രണ്ടാം മോഷണം) പ്രദര്‍ശിപ്പിച്ചു. തായ്‌പേയില്‍ പ്രദര്‍ശിപ്പിക്കുന്ന ആദ്യ മലയാള സിനിമയാണ് ‘എ ആര്‍ എം’. ചിത്രത്തിലെ നായകന്‍ ടോവിനോ തോമസിനെയും സംവിധായകന്‍ ജിതിന്‍ ലാലിനെയും കാണാന്‍ നിരവധിപേരാണ് എത്തിയത്. ഇംഗ്ലീഷ് , ചൈനീസ് സബ്ടൈറ്റിലുകളുടെ സഹായത്തോടെയാണ് എ ആര്‍ എം’ പ്രദര്‍ശിപ്പിച്ചത്.

സുജിത് നമ്പ്യാര്‍, ദിബു നൈനാന്‍, ജോമോന്‍ ടി ജോണ്‍, ഷമീര്‍ മുഹമ്മദ്, ജിതിന്‍ ലാല്‍, സുരഭി ലക്ഷ്മി, ടോവിനോ തോമസ് എന്നിവരോടൊപ്പം മോഹന്‍ലാലിന്റെ ശബ്ദവും തികഞ്ഞ ഹര്‍ഷാരവത്തോടെയാണ് പ്രേക്ഷകര്‍ സ്വീകരിച്ചത്. രണ്ടോ മൂന്നോ ഭാഷയില്‍ ഉള്ള സിനിമകള്‍ മാത്രം കണ്ടു ശീലിച്ച തായ്വാനീസ് പ്രേക്ഷകര്‍ക്ക് നാടോടിക്കഥയുടെയും പ്രണയത്തിന്റെയും പ്രതികാരത്തിന്റെയും സംഗീതത്തിന്റെയുമായ പുതിയ കാഴ്ച്ചാനുഭവങ്ങളാണ് ഈ സിനിമ നല്‍കിയത്.

ടോവിനോയെയും സംവിധായകനായ ജിതിന്‍ ലാലിനെയും സിനിമ കഴിഞ്ഞിട്ടും പതിനൊന്നാംനില മുതല്‍ റോഡ് വരെ കാണികള്‍ വിടാതെ പിന്തുടര്‍ന്നു. രാത്രി വൈകിയും ഓട്ടോഗ്രാഫിനും ഫോട്ടോയ്ക്കും വേണ്ടി ആരാധകര്‍ തിരക്കുകൂട്ടി. ഇന്ത്യന്‍ സിനിമ എന്നാല്‍ ബോളിവുഡ് ആണെന്ന് മാത്രം മനസിലാക്കിയ നിരവധി ആളുകള്‍ക്ക് മുന്‍പിലാണ് ‘എ ആര്‍ എം’ ഇത്തവണ ചരിത്രം തിരുത്തിയത്.