രാജ്യത്തിൻ്റെ മൊത്തം ആഭ്യന്തര ഉത്പാദനവുമായി (ജി.ഡി.പി.) താരതമ്യം ചെയ്യുമ്പോൾ, സമ്പത്തിൻ്റെ വലുപ്പത്തിൽ ഗൾഫ് രാജ്യങ്ങളിൽ കുവൈത്ത് ഒന്നാം സ്ഥാനത്ത് എത്തിയതായി ഏറ്റവും പുതിയ റിപ്പോർട്ട്. ഗ്ലോബൽ എസ്.ഡബ്ല്യു.എഫ്. പുറത്തുവിട്ട ‘സെമഫോർ’ എന്ന വെബ്സൈറ്റ് പ്രസിദ്ധീകരിച്ച റിപ്പോർട്ടിലാണ് ഈ സുപ്രധാന വിവരം ഉൾപ്പെടുത്തിയിരിക്കുന്നത്. കുവൈത്ത് ഇൻവെസ്റ്റ്മെൻ്റ് അതോറിറ്റി, പബ്ലിക് ഇൻസ്റ്റിറ്റ്യൂഷൻ ഫോർ സോഷ്യൽ സെക്യൂരിറ്റി, കുവൈത്ത് സെൻട്രൽ ബാങ്ക് എന്നിവ വഴിയായി കുവൈത്ത് 1.2 ട്രില്യൺ ഡോളർ മൂല്യമുള്ള ആസ്തികളാണ് സമാഹരിച്ചിരിക്കുന്നത്.
കുവൈത്ത് സമാഹരിച്ച 1.2 ട്രില്യൺ ഡോളർ ആസ്തി രാജ്യത്തിൻ്റെ മൊത്തം ആഭ്യന്തര ഉത്പാദനത്തിൻ്റെ (ജി.ഡി.പി.) 7.6 മടങ്ങ് വരും. സമ്പത്തിന്റെ വലുപ്പത്തിൽ മുന്നിലുള്ള അബുദാബിയേക്കാൾ കൂടുതലാണ് ജി.ഡി.പി.യുമായുള്ള ഈ താരതമ്യ അനുപാതം. 2.2 ട്രില്യൺ ഡോളർ മൂല്യമുള്ള നിക്ഷേപങ്ങൾ നിയന്ത്രിക്കുന്ന അബുദാബിയുടെ സമ്പത്ത് അവരുടെ ജി.ഡി.പി.യുടെ 6.7 മടങ്ങ് മാത്രമാണ്. അതേസമയം, ഗ്ലോബൽ എസ്.ഡബ്ല്യു.എഫ്. റിപ്പോർട്ടിലെ മറ്റൊരു പ്രധാന കണ്ടെത്തൽ ഖത്തറിനെക്കുറിച്ചാണ്. ഖത്തർ ഇൻവെസ്റ്റ്മെൻ്റ് അതോറിറ്റി (ക്യു.ഐ.എ.) നവംബറിൽ 4.5 ബില്യൺ ഡോളർ നിക്ഷേപിച്ച് ആഗോള സോവറിൻ വെൽത്ത് ഫണ്ടുകളിൽ ഏറ്റവും കൂടുതൽ പണം ചെലവഴിച്ച സ്ഥാപനമായി മാറി. വർധിച്ചുവരുന്ന വാതക കയറ്റുമതിയിൽ നിന്ന് ലഭിക്കാൻ സാധ്യതയുള്ള ലാഭം നിക്ഷേപിക്കുന്നതിനായി ക്യു.ഐ.എ. തങ്ങളുടെ പ്രവർത്തനങ്ങൾ വർദ്ധിപ്പിക്കുമെന്നും റിപ്പോർട്ട് സൂചിപ്പിക്കുന്നു