പതിനായിരക്കണക്കിന് ഭക്തരും സന്ദർശകരും പങ്കെടുത്ത പാർക്കാടി പൂരത്തിൽ ശുചിത്വപരിപാലന രംഗത്ത് മാതൃകാപരമായ ഇടപെടലുകളാണ് കുന്നംകുളം നഗരസഭ നടപ്പാക്കിയത്. സ്വച്ഛ് സർവേക്ഷൺ 2025-ന്റെ ഭാഗമായി മേളകളും ഉത്സവങ്ങളും നടക്കുന്ന പൊതുസ്ഥലങ്ങളിൽ ശുചിത്വം ഉറപ്പാക്കുക എന്ന ലക്ഷ്യത്തോടെയായിരുന്നു നഗരസഭയുടെ പ്രവർത്തനങ്ങൾ.
വൻ ജനക്കൂട്ടം പ്രതീക്ഷിച്ച സാഹചര്യത്തിൽ, ആസ്പിറേഷണൽ ടോയ്ലറ്റ് മാതൃകയിൽ ആധുനിക സൗകര്യങ്ങളോടുകൂടിയ പ്രത്യേക ടോയ്ലറ്റ് സംവിധാനം നഗരസഭ ഒരുക്കി. സ്ത്രീകൾക്കും പുരുഷന്മാർക്കും പ്രത്യേകം സൗകര്യങ്ങൾ ഉൾപ്പെടുത്തിയ ടോയ്ലറ്റുകൾ പൊതുജനങ്ങൾക്ക് സുരക്ഷിതവും ശുചിത്വവുമുള്ള അനുഭവം ഉറപ്പാക്കി.
കക്കൂസ് മാലിന്യം വേഗത്തിൽ വിഘടിപ്പിക്കുന്നതിനായി പ്രത്യേക ഇനോക്കുലം ടോയ്ലറ്റിൽ ചേർത്തതോടെ 12 മണിക്കൂറിനുള്ളിൽ തന്നെ മാലിന്യത്തിന്റെ പ്രാഥമിക വിഘടനം സാധ്യമായി. ദുർഗന്ധം നിയന്ത്രിക്കാനും രോഗാണു വ്യാപനം തടയാനും ഈ സാങ്കേതിക വിദ്യ സഹായകമായി.
പൂരം സമാപിച്ചതിന് ശേഷം രണ്ടുദിവസത്തിനകം നഗരസഭയുടെ മൊബൈൽ ട്രീറ്റ്മെന്റ് യൂണിറ്റ് ഉപയോഗിച്ച് കക്കൂസ് മാലിന്യം ശാസ്ത്രീയമായി സംസ്കരിച്ചു. ശുദ്ധീകരിച്ച ജലം പരിസ്ഥിതിക്ക് യാതൊരു ദോഷവും ഉണ്ടാക്കാതെ സുരക്ഷിതമായി ഒഴുക്കിവിട്ടതോടെ തുറന്ന പ്രദേശങ്ങളിലേക്കുള്ള മലിനജല ഒഴുക്ക് പൂർണമായും ഒഴിവാക്കാൻ സാധിച്ചു.
മേളകളും ഉത്സവങ്ങളും നടക്കുന്ന സമയങ്ങളിൽ ശുചിത്വപരിപാലനം വലിയ വെല്ലുവിളിയാകുന്ന സാഹചര്യത്തിൽ, പാർക്കാടി പൂരത്തിൽ നടപ്പാക്കിയ ഈ സമഗ്ര ശുചിത്വ സംവിധാനം മികച്ച മാതൃകയായി മാറിയിരിക്കുകയാണ്. പൊതുജനാരോഗ്യവും പരിസ്ഥിതി സംരക്ഷണവും ഒരുപോലെ ഉറപ്പാക്കുന്ന ഈ പ്രവർത്തനം, ശുചിത്വ കാര്യങ്ങളിൽ കുന്നംകുളം നഗരസഭ പുലർത്തുന്ന ഉത്തരവാദിത്തപരമായ സമീപനത്തിന്റെയും സ്വച്ഛ് സർവേക്ഷൺ ലക്ഷ്യങ്ങളോടുള്ള ശക്തമായ പ്രതിബദ്ധതയുടെയും തെളിവാണ്.