കണ്ണൂർ ജില്ലയിൽ തദ്ദേശ തിരഞ്ഞെടുപ്പിൽ യുഡിഎഫ് സ്ഥാനാർത്ഥികളുടെ പത്രികകൾ തള്ളിയതോടെ പല വാർഡുകളിലും എൽഡിഎഫ് സ്ഥാനാർത്ഥികൾ എതിരില്ലാതെ തിരഞ്ഞെടുക്കപ്പെട്ടു. കണ്ണപുരം, മലപ്പട്ടം പഞ്ചായത്തുകളിലെ വാർഡുകളിലാണ് എൽഡിഎഫ് എതിരില്ലാതെ വിജയിച്ചത്. കണ്ണപുരത്തെ 10-ാം വാർഡിലെയും മലപ്പട്ടത്തെ 12-ാം വാർഡിലെയും യുഡിഎഫ് സ്ഥാനാർത്ഥികളുടെ പത്രികകളാണ് സൂക്ഷ്മ പരിശോധനയിൽ തള്ളിയത്.
നേരത്തെ കണ്ണപുരം, മലപ്പട്ടം ഗ്രാമപഞ്ചായത്തുകളിലെ രണ്ടിടങ്ങളിൽ എൽഡിഎഫ് സ്ഥാനാർത്ഥികളുടെ വിജയം ഉറപ്പിച്ചിരുന്നു. കണ്ണപുരത്ത് 13-ാം വാർഡിലെ രേഷ്മ പി. വി, 14-ാം വാർഡിലേക്ക് മത്സരിക്കുന്ന രതി പി എന്നിവർക്കും മലപ്പട്ടം പഞ്ചായത്തിലെ അടുവാപ്പുറം നോർത്തിൽ മത്സരിക്കുന്ന ഐ. വി. ഒതേനൻ, അടുവാപ്പുറം സൗത്തിൽ മത്സരിക്കുന്ന സി. കെ. ശ്രേയ എന്നിവർക്കും എതിർ സ്ഥാനാർത്ഥികളില്ല.
കൂടാതെ, ആന്തൂർ നഗരസഭയിലെ മോഴാറ വാർഡിൽ മത്സരിക്കുന്ന കെ. രജിത, പൊടിക്കുണ്ട് വാർഡിലെ കെ. പ്രേമരാജൻ എന്നിവർക്കും എതിരില്ല. നാമനിർദ്ദേശ പത്രിക സമർപ്പിക്കേണ്ട അവസാന ദിവസമായ ഇന്നലെ ആറിടങ്ങളിലും മറ്റ് പത്രികകളൊന്നും സമർപ്പിക്കാതിരുന്നതോടെ എൽഡിഎഫ് ഈ സ്ഥാനാർത്ഥികളുടെ വിജയം ഉറപ്പിച്ച് രംഗത്തെത്തുകയായിരുന്നു.
കാസർകോട് ജില്ലയിലും ഒരു സ്ഥാനാർത്ഥി എതിരില്ലാതെ തിരഞ്ഞെടുക്കപ്പെട്ടിട്ടുണ്ട്. മംഗൽപാടി പഞ്ചായത്തിലെ 24-ാം വാർഡായ മണിമുണ്ടയിലാണ് മുസ്ലിം ലീഗ് സ്ഥാനാർത്ഥിയായ സമീന ടീച്ചർ എതിരില്ലാതെ മത്സരിക്കുന്നത്. മഞ്ചേശ്വരം ബ്ലോക്ക് പഞ്ചായത്ത് പ്രസിഡന്റാണ് സമീന ടീച്ചർ. കഴിഞ്ഞ തിരഞ്ഞെടുപ്പിൽ മുസ്ലിം ലീഗ് സ്ഥാനാർത്ഥി പരാജയപ്പെട്ട വാർഡാണിത്. എൽഡിഎഫ് സ്ഥാനാർത്ഥിയായ മുഹമ്മദ് ആണ് അന്ന് വാർഡിൽ നിന്നും വിജയിച്ചത്. മുഹമ്മദ് പിന്നീട് മുസ്ലിം ലീഗിൽ ചേർന്നതോടെയാണ് സിപിഐഎമ്മിന് ഈ വാർഡിൽ സ്ഥാനാർത്ഥി ഇല്ലാതെയായത്.