ഡിസിസി പ്രസിഡന്റ് സ്ഥാനം രാജിവെച്ചെന്ന വാർത്ത തീർത്തും നിഷേധിച്ച് എൻ ശക്തൻ രംഗത്ത്. പ്രചരിക്കുന്ന വാർത്ത ‘ഒരു ശതമാനം പോലും ശരിയല്ല’ എന്ന് ശക്തൻ ശക്തമായി പ്രതികരിച്ചു. “ആരാണ് നിങ്ങൾക്ക് ഈ വാർത്ത നൽകിയതെന്ന് എനിക്കറിയണം,” എന്ന് ചോദിച്ച അദ്ദേഹം, തന്റെ ചില ‘നല്ല സുഹൃത്തുക്കളാണ്’ രാജിവാർത്ത പ്രചരിപ്പിക്കുന്നതെന്നും കൂട്ടിച്ചേർത്തു.
അഭ്യൂഹങ്ങൾക്ക് കാരണം
ഡിസിസി പ്രസിഡന്റായിരുന്ന പാലോട് രവി ഫോൺ വിവാദത്തിൽ കുടുങ്ങിയതിനെത്തുടർന്നാണ് എൻ ശക്തന് താൽക്കാലിക ചുമതല നൽകിയത്. രണ്ടാഴ്ചയ്ക്കുള്ളിൽ പുതിയ അധ്യക്ഷനെ പ്രഖ്യാപിക്കുമെന്ന് നേതൃത്വം ഉറപ്പുനൽകിയിരുന്നു. താൽക്കാലിക അധ്യക്ഷനായി തുടരാൻ താത്പര്യമില്ലെന്ന് ശക്തൻ നേതൃത്വത്തെ അറിയിച്ചതായും, വരാനിരിക്കുന്ന നിയമസഭാ തെരഞ്ഞെടുപ്പിൽ മത്സരിക്കുന്നതിനുള്ള ഒരുക്കത്തിന്റെ ഭാഗമായാണ് രാജിയെന്നുമുള്ള അഭ്യൂഹങ്ങളാണ് പ്രചരിച്ചിരുന്നത്.
അതേസമയം, തിരുവനന്തപുരം ജില്ലയിലെ തദ്ദേശ തിരഞ്ഞെടുപ്പിനായുള്ള സ്ഥാനാർത്ഥി നിർണയം പൂർത്തിയാക്കിയെന്നും, ഈ ലിസ്റ്റ് ഇന്നലെ കെപിസിസി പ്രസിഡന്റിന് കൈമാറിയിട്ടുണ്ടെന്നും ശക്തൻ വ്യക്തമാക്കി. ഇതോടെ, രാജി സംബന്ധിച്ചുള്ള ഊഹാപോഹങ്ങൾക്ക് വിരാമമായി.