ഇന്ത്യ ഒരു ഹിന്ദു രാഷ്ട്രവും ഹിന്ദു സമൂഹവുമാണെന്ന് ആർഎസ്എസ് മേധാവി മോഹൻ ഭാഗവത്. ലക്നൗവിൽ നടന്ന ദിവ്യഗീത പ്രേരണ ഉത്സവത്തിൽ സംസാരിക്കുകയായിരുന്നു അദ്ദേഹം. ഉത്തർപ്രദേശ് മുഖ്യമന്ത്രി യോഗി ആദിത്യനാഥും ചടങ്ങിൽ പങ്കെടുത്തു.
ഇന്ത്യ ഒരു കാലത്ത് വിശ്വഗുരുവായിരുന്നെന്നും, എന്നാൽ അധിനിവേശങ്ങളുടെ കാലത്ത് ക്ഷേത്രങ്ങൾ നശിപ്പിക്കപ്പെടുകയും നിർബന്ധിത മതപരിവർത്തനം പോലുള്ള സംഭവങ്ങൾ രാജ്യത്തെ അടിമത്തത്തിലേക്ക് തള്ളിവിടുകയും ചെയ്തു എന്നും അദ്ദേഹം അഭിപ്രായപ്പെട്ടു. “അധിനിവേശത്തിന്റെ നാളുകൾ കഴിഞ്ഞു. ഇപ്പോൾ നമ്മൾ രാമക്ഷേത്രത്തിനു മുകളിൽ പതാക ഉയർത്തി. ‘നൂറ്റാണ്ടുകളുടെ അടിച്ചമർത്തലുകൾക്കിടയിലും ഇന്ത്യയുടെ സാംസ്കാരിക സ്വത്വം അതിജീവിച്ചു,’ മോഹൻ ഭാഗവത് പറഞ്ഞു.
ഭഗവത് ഗീതയുടെ പ്രസക്തി
ഭഗവാൻ വ്യാസൻ, ലോകത്തെക്കുറിച്ചുള്ള എല്ലാ പാരമ്പര്യങ്ങളുടെയും അറിവിൻ്റെയും സാരാംശം ഗീതയിലെ 700 ശ്ലോകങ്ങളിലൂടെ നൽകിയിട്ടുണ്ട്. ആയിരം വർഷങ്ങൾക്ക് മുൻപ് നടന്നതുപോലുള്ള യുദ്ധങ്ങളും കുറ്റകൃത്യങ്ങളും അത്യാഗ്രഹവും ഇന്നും സമൂഹത്തിൽ നിലനിൽക്കുന്നുണ്ട്. എല്ലാ യുഗങ്ങളിലും സാഹചര്യങ്ങളിലും ഭഗവത് ഗീത വ്യക്തതയും മാർഗനിർദേശവും നൽകുന്നു.
ഒരാൾ ഗീതയെ അതിൻ്റെ യഥാർഥ രൂപത്തിൽ വായിക്കുകയും ആഴത്തിൽ മനസ്സിലാക്കുകയും വേണം. അപ്പോൾ എല്ലാം വ്യക്തമാകും. ഗീതയുടെ ഒരു പ്രത്യേക ഗുണം, അതിനെക്കുറിച്ച് ചിന്തിക്കുമ്പോഴെല്ലാം, നിലവിലെ സാഹചര്യത്തിനു പ്രസക്തമായ പുതിയ അറിവ് ലഭിക്കുന്നു എന്നതാണ്. ഭഗവാൻ കൃഷ്ണൻ വ്യക്തികളെ പ്രശ്നങ്ങളിൽ നിന്ന് ഓടിപ്പോകാൻ അല്ല, മറിച്ച് ഉറച്ചുനിന്ന് അവയെ നേരിടാനാണ് പഠിപ്പിക്കുന്നത്. ഭൗതികമായ അഭിവൃദ്ധി വർധിച്ചു വരുന്നുണ്ടെങ്കിലും, സമൂഹത്തിൽ ധാർമികത, സമാധാനം, സംതൃപ്തി എന്നിവയുടെ അഭാവമുണ്ടെന്നും മോഹൻ ഭാഗവത് കൂട്ടിച്ചേർത്തു.