ഫേസ്ബുക്ക്, ഇൻസ്റ്റാഗ്രാം പ്ലാറ്റ്‌ഫോമുകളിലെ കണ്ടന്റ് സംരക്ഷിക്കുന്നതിനായി പുതിയ ഫീച്ചറുമായി മെറ്റ എത്തി. സോഷ്യൽ മീഡിയയിൽ ഏറെ വ്യാപകമായ കണ്ടന്റ് മോഷണം തടയുന്നതിനാണ് ഈ പുതിയ സംവിധാനം. ഒരു വ്യക്തി പോസ്റ്റ് ചെയ്യുന്ന റീലുകൾ വ്യൂസിനും ലൈക്കിനുമായി മറ്റുള്ളവർ ഉപയോഗിക്കുന്നതും, റീൽ റിയാക്ഷൻ വീഡിയോകൾ ചെയ്യുന്നതും ഇത്തരം പ്ലാറ്റ്‌ഫോമുകളിൽ സാധാരണമാണ്. ഈ മോഷണങ്ങളിൽ നിന്ന് ഒറിജിനൽ കണ്ടന്റിനെ സംരക്ഷിക്കുക എന്നതാണ് പുതിയ ഫീച്ചറിന്റെ ലക്ഷ്യം.
പുതിയ ഫീച്ചർ ഉപയോഗിച്ച് ഒറിജിനൽ റീലുകൾ ഓട്ടോമാറ്റിക്കായി സംരക്ഷിക്കപ്പെടും. ഫേസ്ബുക്കിലും ഇൻസ്റ്റാഗ്രാമിലും ഈ റീലുകളുടെ കോപ്പികൾക്കായി തിരയാനും, കണ്ടെത്തിയാൽ നിയമനടപടികൾ സ്വീകരിക്കാനും ഇതുവഴി സാധിക്കും. കോപ്പിറൈറ്റ് സംരക്ഷിക്കാൻ ഉപയോഗിക്കുന്ന ‘റൈറ്റ്സ് മാനേജർ’ (Rights Manager) എന്ന സാങ്കേതികവിദ്യ തന്നെയാണ് ഈ പുതിയ ഫീച്ചറിനും പിന്നിലുള്ളത്. ഇത് റീൽസ് ക്രിയേറ്റർമാർക്ക് എളുപ്പത്തിൽ ഉപയോഗിക്കാൻ സാധിക്കുന്ന രൂപത്തിലാണ് സജ്ജീകരിച്ചിരിക്കുന്നത്.
നിലവിൽ മെറ്റയുടെ കണ്ടന്റ് മോണിറ്റൈസേഷൻ പ്രോഗ്രാമിൽ ഉൾപ്പെട്ടതും, കണ്ടന്റ് ഉള്ളടക്കത്തിൽ ഒറിജിനാലിറ്റി മാനദണ്ഡങ്ങൾ പാലിക്കുന്നതുമായ ക്രിയേറ്റർമാർക്കാണ് ആദ്യ ഘട്ടത്തിൽ ഈ ഫീച്ചർ ലഭ്യമാവുക.