ശബരിമല സ്വർണ്ണക്കൊള്ള കേസിൽ അറസ്റ്റിലായ മുൻ ദേവസ്വം പ്രസിഡന്റും മുൻ കമ്മീഷണറുമായ എൻ വാസുവിന്റെ റിമാൻഡ് കാലാവധി കൊല്ലം വിജിലൻസ് കോടതി 14 ദിവസത്തേക്ക് കൂടി നീട്ടി. കോടതിയിൽ നിന്ന് വാസുവിനെ ഇറക്കുന്ന സമയത്ത്, ബിജെപി പ്രവർത്തകർ മുദ്രാവാക്യം വിളിച്ചും കരിങ്കൊടി കാണിച്ചും ശക്തമായി പ്രതിഷേധിച്ചു. വിലങ്ങില്ലാതെയാണ് വാസുവിനെ കോടതിയിൽ ഹാജരാക്കിയത്.
പത്മകുമാർ കസ്റ്റഡിയിൽ, അന്വേഷണം നിർണായക ഘട്ടത്തിൽ
കേസിൽ നേരത്തെ അറസ്റ്റിലായ മുൻ ദേവസ്വം പ്രസിഡൻ്റ് എ പത്മകുമാറിൻ്റെ കസ്റ്റഡി അപേക്ഷ കൊല്ലം വിജിലൻസ് കോടതി ബുധനാഴ്ച പരിഗണിക്കും. പ്രത്യേക അന്വേഷണ സംഘം (എസ്.ഐ.ടി.) പ്രൊഡക്ഷൻ വാറൻ്റ് സമർപ്പിച്ചിട്ടുണ്ട്. കേസിലെ മുഖ്യപ്രതിയായ ഉണ്ണിക്കൃഷ്ണൻ പോറ്റിയുമായുള്ള ഇടപാടുകളിൽ വിശദമായ പരിശോധന നടത്തുന്നതിനാണ് പത്മകുമാറിനെ എസ്.ഐ.ടി കസ്റ്റഡിയിൽ വാങ്ങുന്നത്. പോറ്റി സർക്കാരിനെയും സമീപിച്ചിരുന്നുവെന്ന പത്മകുമാറിൻ്റെ മൊഴിയിലും അന്വേഷണ സംഘം കൂടുതൽ വ്യക്തത വരുത്തും.
ജാമ്യാപേക്ഷകൾ മാറ്റിവച്ചു
കേസിലെ മറ്റ് പ്രതികളായ മുൻ ദേവസ്വം കമ്മീഷണർ എൻ വാസുവിൻ്റെയും മുൻ തിരുവാഭരണം കമ്മീഷണർ കെ.എസ് ബൈജുവിൻ്റെയും ജാമ്യാപേക്ഷകൾ പരിഗണിക്കുന്നത് നാളത്തേക്ക് മാറ്റി. എസ്.ഐ.ടിയുടെ അന്വേഷണ റിപ്പോർട്ട് കൂടി കോടതി ആവശ്യപ്പെട്ടിട്ടുണ്ട്. മുൻ അഡ്മിനിസ്ട്രേറ്റീവ് ഓഫീസർ മുരാരി ബാബുവിൻ്റെ ജാമ്യ ഹർജിയിൽ വിജിലൻസ് കോടതി നാളെ വിധി പറയും.