രാജ്യത്തെ കുപ്രസിദ്ധ മോഷ്ടാവായ ബണ്ടി ചോറിനെ എറണാകുളം സൗത്ത് റെയില്‍വേ സ്റ്റേഷനില്‍ തടഞ്ഞു. റെയിൽവേ സ്റ്റേഷനിൽ വെച്ച് നടത്തിയ പതിവ് വെരിഫിക്കേഷന്റെ ഭാഗമായാണ് ഇയാളെ തടഞ്ഞുവെച്ചത്.
എന്നാൽ, ഒരു കേസിന്റെ ആവശ്യത്തിനായി കോടതിയിൽ ഹാജരാകാനായാണ് താൻ കേരളത്തിലെത്തിയതെന്ന് ബണ്ടി ചോർ പോലീസിനോട് പ്രതികരിച്ചു. ഇന്ത്യയിലെ വിവിധ സംസ്ഥാനങ്ങളിലായി എഴുന്നൂറിലധികം കവർച്ചാ കേസുകളിൽ പ്രതിയാണ് ഈ മോഷ്ടാവ്. ധനികരുടെയും ഉന്നതരുടെയും വീടുകളിൽ മാത്രം മോഷണം നടത്തുന്നതാണ് ബണ്ടി ചോറിന്റെ രീതി
2013 ജനുവരിയിൽ തിരുവനന്തപുരം മരപ്പാലത്തെ ഒരു വീട്ടിൽ മോഷണം നടത്തിയ കേസിലാണ് ഇയാളെ കേരളാ പോലീസ് പിടികൂടിയത്. പത്തുവർഷത്തോളം ശിക്ഷ പൂർത്തിയാക്കിയ ശേഷമാണ് ബണ്ടി ചോർ ജയിലിൽ നിന്ന് പുറത്തിറങ്ങിയത്. മോഷണം നിർത്തുകയാണെന്ന് ജയിൽ അധികൃതരോട് ഉറപ്പുനൽകിയിരുന്നെങ്കിലും ഇയാൾ പഴയ ശീലം തുടർന്നു. കഴിഞ്ഞ വർഷം ഉത്തർപ്രദേശിൽവെച്ചാണ് ഡൽഹി പോലീസ് ബണ്ടി ചോറിനെ വീണ്ടും പിടികൂടിയത്.