മനുഷ്യന്റെ ആയുസ്സ് 65-നും 70-നും ഇടയിൽ എന്ന് പൊതുവെ കണക്കാക്കുന്ന ഒരു കാലഘട്ടത്തിൽ, ചൈനയിലെ ഷെൻ‌ഷെൻ ആസ്ഥാനമായുള്ള ലോൺവി ബയോസയൻസസ് (Longevity Biosciences) എന്ന ബയോടെക്നോളജി സ്ഥാപനം നടത്തിയ ഒരു അവകാശവാദം ലോകമെമ്പാടുമുള്ള ശാസ്ത്ര സമൂഹത്തിലും പൊതുജനങ്ങളിലും കൗതുകവും സംശയവും ഒരുപോലെ ഉണർത്തിയിരിക്കുകയാണ്, മനുഷ്യർക്ക് 150 വർഷം വരെ ജീവിക്കാൻ കഴിയുമത്രേ! ഈ ലക്ഷ്യം കൈവരിക്കാൻ സഹായിക്കുന്ന ഒരു ‘പ്രത്യേക ദീർഘായുസ്സ് ഗുളിക’ തങ്ങൾ വികസിപ്പിച്ചെടുത്തതായാണ് കമ്പനി പറയുന്നത്. വാർദ്ധക്യത്തെ മന്ദഗതിയിലാക്കാൻ ലക്ഷ്യമിടുന്ന ഈ പുതിയ ശാസ്ത്ര വിപ്ലവം ആഗോളതലത്തിൽ വലിയ ചർച്ചകൾക്ക് തിരികൊളുത്തിയിരിക്കുന്നു.
ലോൺവി ബയോസയൻസസ് വികസിപ്പിച്ചെടുത്ത ഈ മരുന്ന് വാർദ്ധക്യത്തിന്റെ പ്രധാന കാരണങ്ങളിലൊന്നായി കണക്കാക്കപ്പെടുന്ന ‘വാർദ്ധക്യ കോശങ്ങളെ’ അഥവാ ‘സോംബി കോശങ്ങളെ’ ലക്ഷ്യമിട്ടാണ് പ്രവർത്തിക്കുന്നത്.
വിഭജനം നിർത്തുകയും എന്നാൽ ശരീരത്തിൽ വിട്ടുമാറാത്ത വീക്കം (Chronic Inflammation) ഉണ്ടാക്കുകയും ചെയ്യുന്ന കോശങ്ങളാണിവ. പ്രായവുമായി ബന്ധപ്പെട്ട എല്ലാ ശാരീരിക ക്ഷയങ്ങൾക്കും ഈ കോശങ്ങൾ കാരണമാകുന്നതായി ശാസ്ത്രജ്ഞർ വിശ്വസിക്കുന്നു. മുന്തിരി വിത്തിൽ നിന്ന് വേർതിരിച്ചെടുത്ത പ്രോസയാനിഡിൻ സി1 (Procyanidin C1 – PCC1) എന്ന തന്മാത്രയാണ് ഗുളികയിലെ പ്രധാന ഘടകം. ഈ കോശങ്ങളെ നിർവീര്യമാക്കുകയും അതുവഴി വാർദ്ധക്യത്തിന്റെ വേഗത കുറച്ച് ആയുസ്സ് വർദ്ധിപ്പിക്കുകയുമാണ് ഗുളിക ലക്ഷ്യമിടുന്നത്.
ലോൺവി ബയോസയൻസസ് ലാബുകളിൽ എലികളിൽ നടത്തിയ പരീക്ഷണങ്ങൾ ശ്രദ്ധേയമായ ഫലങ്ങളാണ് നൽകിയിരിക്കുന്നത്,
ഫോർമുലേഷൻ നൽകിയ എലികളിൽ മൊത്തത്തിലുള്ള ആയുസ്സിൽ 9.4% വർദ്ധനവ് രേഖപ്പെടുത്തി. അതായത് ചികിത്സയുടെ ആദ്യ ദിവസം മുതൽ എലികളുടെ ശേഷിക്കുന്ന ആയുസ്സ് 64% ൽ കൂടുതൽ വർദ്ധിച്ചു.
ഈ ഡാറ്റ, കോശങ്ങളെ അടിസ്ഥാനമാക്കിയുള്ള ഇടപെടലുകൾ ആയുസ്സ് ഗണ്യമായി വർദ്ധിപ്പിക്കാൻ സാധ്യതയുണ്ടെന്ന് സ്ഥാപനം വാദിക്കുന്നു. 150 വയസ്സ് വരെ ജീവിക്കുന്നത് “തീർച്ചയായും യാഥാർത്ഥ്യബോധമുള്ളതാണ്” എന്ന് കമ്പനിയുടെ ചീഫ് ടെക്നോളജി ഓഫീസർ ലിയു ക്വിൻ‌ഹുവ ന്യൂയോർക്ക് ടൈംസിനോട് അഭിപ്രായപ്പെട്ടു.
2024-ൽ ചൈനയുടെ ശരാശരി ആയുർദൈർഘ്യം 79 വർഷത്തിലെത്തി. ഇത് ആഗോള ശരാശരിയേക്കാൾ ഏകദേശം 5 വർഷം കൂടുതലാണ്. ഷാങ്ഹായ് ആസ്ഥാനമായുള്ള ലോങ്‌അപ്പ് സ്റ്റാർട്ടപ്പ് ആയ ടൈം പൈയുടെ സഹസ്ഥാപകനായ ഗാൻ യു പറയുന്നതനുസരിച്ച്, ചൈനയിൽ ഒരു സാംസ്കാരിക മാറ്റം നടക്കുന്നുണ്ട്. “നേരത്തെ, കൂടുതൽ കാലം ജീവിക്കുന്നതിനെക്കുറിച്ച് ചൈനയിൽ ആരും സംസാരിച്ചിരുന്നില്ല. എന്നാൽ ഇപ്പോൾ നിരവധി ചൈനക്കാർ ദീർഘായുസ്സിൽ നിക്ഷേപം നടത്തുന്നു,” അദ്ദേഹം പറഞ്ഞു. വർദ്ധിച്ചുവരുന്ന പൊതുജന താൽപ്പര്യവും നയപരമായ ശ്രദ്ധയും സ്വകാര്യ നിക്ഷേപവും കാരണം ഈ കണക്ക് ഇനിയും ഉയരുമെന്നാണ് ശാസ്ത്രജ്ഞരുടെ വിലയിരുത്തൽ.
ലോൺവി ബയോസയൻസസിന്റെ അവകാശവാദങ്ങൾ ശുഭാപ്തിവിശ്വാസം നൽകുന്നുണ്ടെങ്കിലും, ഈ പ്രാഥമിക ഫലങ്ങളിൽ മാത്രം വിശ്വാസമർപ്പിക്കുന്നത് ഉചിതമല്ലെന്ന് പല വിദഗ്ധരും മുന്നറിയിപ്പ് നൽകുന്നു.
എലികളെക്കുറിച്ചുള്ള പഠനങ്ങൾ പ്രോത്സാഹനജനകമാണെങ്കിലും, അവ പ്രാഥമിക തലത്തിൽ മാത്രമാണ്. ഗുളികയുടെ സുരക്ഷയെക്കുറിച്ചോ മനുഷ്യരിലെ ഫലപ്രാപ്തിയെക്കുറിച്ചോ നിഗമനങ്ങളിൽ എത്തിച്ചേരുന്നതിന് മുമ്പ്, വിപുലമായ മനുഷ്യ പരീക്ഷണങ്ങൾ നടത്തേണ്ടത് അനിവാര്യമാണെന്ന് ശാസ്ത്ര സമൂഹം ചൂണ്ടിക്കാട്ടുന്നു.