തദ്ദേശ പൊതുതിരഞ്ഞെടുപ്പ് ദിവസം വോട്ട് രേഖപ്പെടുത്തുന്നതിന് സ്വകാര്യ സ്ഥാപനങ്ങളിലെ തൊഴിലാളികൾക്ക് വേതനത്തോട് കൂടിയുള്ള അവധി അനുവദിച്ച് നല്കണമെന്ന് സംസ്ഥാന തിരഞ്ഞെടുപ്പ് കമ്മീഷന് ഉത്തരവിറക്കി. തദ്ദേശ സ്വയംഭരണ സ്ഥാപനങ്ങളിലേക്ക് ഡിസംബർ ഒമ്പതിന് പൊതുതിരഞ്ഞെടുപ്പ് നടക്കുന്ന തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലെ സ്വകാര്യ മേഖലയിലുള്ള ഏതെങ്കിലും വാണിജ്യ സ്ഥാപനത്തിലോ വ്യാപാര സ്ഥാപനത്തിലോ വ്യവസായ സ്ഥാപനത്തിലോ മറ്റ് ഏതെങ്കിലും സ്ഥാപനത്തിലോ ജോലിയില് ഏര്പ്പെട്ടിരിക്കുന്നതും പഞ്ചായത്ത്/മുനിസിപ്പാലിറ്റി തിരഞ്ഞെടുപ്പില് വോട്ടു ചെയ്യുന്നതിന് അര്ഹതയുള്ളതുമായ ആളുകള്ക്ക് വോട്ടു രേഖപ്പെടുത്തുന്നതിന് വേതനത്തോട് കൂടിയുള്ള അവധി നല്കണമെന്നാണ് നിർദ്ദേശം. അപ്രകാരം ഒരാളിന് അവധി അനുവദിക്കുന്നതുമൂലം അയാള് ഏര്പ്പെട്ടിരിക്കുന്ന തൊഴിലിന് ആപത്ക്കരമോ സാരവത്തായ നഷ്ടമോ ഇടവരുന്നെങ്കില് അയാള്ക്ക് വോട്ട് രേഖപ്പെടുത്തുന്നതിന് പ്രത്യേക അനുമതി നല്കണമെന്നും ബന്ധപ്പെട്ട അധികാരികളോട് ഉത്തരവില് നിര്ദ്ദേശിച്ചിട്ടുണ്ട്.
സ്വന്തം ജില്ലയ്ക്ക് പുറത്ത് ജോലിയില് ഏര്പ്പെട്ടിരിക്കുന്ന വോട്ടര്മാര്ക്ക് ബന്ധപ്പെട്ട വോട്ടെടുപ്പ് ദിവസം സ്വന്തം ജില്ലയിലെ പോളിംഗ് സ്റ്റേഷനിലെത്തി വോട്ട് ചെയ്യുന്നതിനു പ്രത്യേക അനുമതി നല്കണമെന്നും ഉത്തരവില് പറയുന്നു.