ഗോവയിലെ ബാഗാ ബീച്ചിന് സമീപമുള്ള ബിർച്ച് ബൈ റോമിയോ ലെയ്ൻ എന്ന പ്രശസ്തമായ നിശാക്ലബ്ബിലുണ്ടായ തീപിടിത്തത്തിൽ വിനോദസഞ്ചാരികൾ ഉൾപ്പെടെ 23 പേർ മരിച്ചു. അർദ്ധരാത്രിയോടെ ഉണ്ടായ ഈ അപകടത്തിൽ സിലിണ്ടർ പൊട്ടിത്തെറിച്ചതാണ് സ്ഫോടനത്തിന് കാരണമെന്നാണ് പ്രാഥമിക നിഗമനം. മരിച്ചവരിൽ അധികവും ക്ലബ്ബിലെ ജീവനക്കാരാണെന്നാണ് കരുതുന്നത്. ഡിജിപി ഉൾപ്പെടെയുള്ള മുതിർന്ന പോലീസ് ഉദ്യോഗസ്ഥരും വടക്കൻ ഗോവ ജില്ലയിൽ നിന്നുള്ള പോലീസ് സംഘങ്ങളും സംഭവസ്ഥലത്തെത്തി രക്ഷാപ്രവർത്തനങ്ങൾക്ക് മേൽനോട്ടം വഹിച്ചു വരുന്നു. ഇതുവരെ 23 പേരുടെ മരണമാണ് റിപ്പോർട്ട് ചെയ്തത്.
തീപിടിത്തം പ്രധാനമായും പടർന്നത് ക്ലബ്ബിന്റെ താഴത്തെ നിലയിലെ അടുക്കള ഭാഗത്ത് നിന്നാണ്. കൂടുതൽ മൃതദേഹങ്ങൾ അടുക്കള ഭാഗത്ത് നിന്ന് കണ്ടെത്തിയതിനാൽ മരണപ്പെട്ടവരിൽ അധികവും ക്ലബ്ബിലെ ജീവനക്കാരാണെന്നാണ് അനുമാനിക്കുന്നത്. അതേസമയം, പ്രവേശന കവാടത്തിൽ നിന്നും രണ്ട് മൃതദേഹങ്ങൾ കണ്ടെത്തിയിട്ടുണ്ട്. തീപിടിത്തത്തിന്റെ ഉറവിടവും കാരണവും ഇതുവരെ വ്യക്തമായിട്ടില്ല.
