ബാഹുബലി’, ‘ആർആർആർ’ തുടങ്ങിയ ബ്രഹ്മാണ്ഡ ചിത്രങ്ങളിലൂടെ ലോകമെമ്പാടുമുള്ള പ്രേക്ഷകരെ പുരാണ കഥകളിലേക്ക് ‘ആവാഹിച്ച’ സംവിധായകൻ എസ്.എസ്. രാജമൗലിയുടെ പുതിയ പ്രസ്താവന വലിയ ചർച്ചകൾക്ക് വഴിയൊരുക്കിയിരിക്കുകയാണ്. തൻ്റെ പുതിയ ചിത്രമായ ‘വാരണാസി’യുടെ ലോഞ്ചിംഗ് ചടങ്ങിനിടെയാണ് താൻ ദൈവത്തിൽ വിശ്വസിക്കുന്നില്ലെന്ന് രാജമൗലി പരസ്യമായി പ്രഖ്യാപിച്ചത്. ‘വാരണാസി’യുടെ ലോഞ്ചിംഗ് ചടങ്ങിനിടെ നേരിട്ട സാങ്കേതിക തകരാറുകളെയും ചോർച്ചകളെയും പരാമർശിച്ചായിരുന്നു രാജമൗലിയുടെ വികാരഭരിതമായ പ്രതികരണം.
“ഇതൊരു വൈകാരിക നിമിഷമാണ്. ഞാൻ ദൈവത്തിൽ വിശ്വസിക്കുന്നില്ല. എൻ്റെ അച്ഛൻ അടുത്ത് വന്ന്, ഭഗവാൻ ഹനുമാൻ പിന്നിൽ നിന്ന് കാര്യങ്ങൾ നോക്കിക്കൊള്ളുമെന്ന് പറഞ്ഞു. ഇങ്ങനെയാണോ അദ്ദേഹം ശ്രദ്ധിക്കുന്നത് – ഇതൊക്കെ ആലോചിക്കുമ്പോൾ എനിക്ക് ദേഷ്യം വരുന്നു,” രാജമൗലി സദസ്സിനെ അഭിസംബോധന ചെയ്ത് പറഞ്ഞു.
തൻ്റെ ഭാര്യയെക്കുറിച്ചും അദ്ദേഹം സംസാരിച്ചു. ഭാര്യക്ക് ഹനുമാനെ വളരെ ഇഷ്ടമാണെന്നും, അവർ സുഹൃത്തിനെപ്പോലെ പെരുമാറി സംസാരിക്കാറുണ്ടെന്നും അദ്ദേഹം വെളിപ്പെടുത്തി.
വിമർശനവും ആശയക്കുഴപ്പവും: പുരാണ ചിത്രീകരണം എന്തിനാണ്?
രാജമൗലിയുടെ ഈ പ്രസ്താവന പ്രേക്ഷകരിലും സോഷ്യൽ മീഡിയയിലും ആശയക്കുഴപ്പവും വിമർശനവും ഉയർത്തിയിട്ടുണ്ട്. ‘ആർആർആർ’, ‘ബാഹുബലി’ തുടങ്ങിയ ചിത്രങ്ങളിൽ ഹിന്ദു പുരാണങ്ങളെയും ഇതിഹാസങ്ങളെയും പ്രചോദനമായി സ്വീകരിച്ച ഒരാൾ എങ്ങനെ നിരീശ്വരവാദിയാകും എന്നായിരുന്നു പലരുടെയും ചോദ്യം.
ഒരു സോഷ്യൽ മീഡിയ ഉപയോക്താവിൻ്റെ പ്രതികരണം ഇങ്ങനെയായിരുന്നു: “ദൈവത്തിൽ വിശ്വസിക്കാത്ത ഒരാൾക്ക് എങ്ങനെ ‘വാരണാസി’ എന്ന് പേരിട്ട് പുരാണ കഥാപാത്രങ്ങളെ ഉപയോഗിക്കാൻ കഴിയും? ആളുകൾക്ക് വേദനിക്കുന്നത് അദ്ദേഹത്തിന് അറിയില്ലേ? അദ്ദേഹത്തിൻ്റെ പദവിയുള്ള ഒരു മനുഷ്യനിൽ നിന്ന് ഇത് പ്രതീക്ഷിക്കുന്നില്ല.”
അതേസമയം, മറ്റൊരു വിഭാഗം രാജമൗലിയെ പിന്തുണച്ചു. “അദ്ദേഹം ഒരു സമൂഹത്തെയും ലക്ഷ്യമിടുന്നില്ല, ഹിന്ദു പുരാണങ്ങളെ കഥാപാത്രങ്ങൾക്ക് പ്രചോദനമായി എടുക്കുക മാത്രമാണ്. നിരീശ്വരവാദിയാണെന്ന് കള്ളം പറഞ്ഞു എന്ന് പറഞ്ഞാൽ എന്താണ് വലിയ കാര്യം എന്നായിരുന്നു ഒരു സോഷ്യൽ മീഡിയ പ്രതികരണം.