തമിഴിൽ പൊങ്കൽ റിലീസിനൊരുങ്ങുന്ന രണ്ട് പ്രധാന ചിത്രങ്ങളാണ് വിജയ് നായകനായി എത്തുന്ന ജന നായകനും ശിവ കാർത്തികേയൻ ചിത്രം പരാശക്തിയും. വിജയ് യുടെ സിനിമാ ജീവിതത്തിലെ അവസാന ചിത്രം എന്ന പ്രത്യേകതയും ജന നായകൻ സിനിമയ്ക്കുണ്ട്. റിലീസ് ക്ലാഷ് സംബന്ധിച്ച് കൊടുമ്പിരി കൊണ്ട ചർച്ചകളാണ് തമിഴ് സിനിമ ആരാധകർക്കിടയിൽ നടന്നുകൊണ്ടിരിക്കുന്നത്. ക്ലാഷ് റിലീസ് ആയതുകൊണ്ട് തന്നെ വാലിൽ രീതിയിലുള്ള ചർച്ചകളാണ് ഇതിനുപിന്നാലെ രൂപപ്പെട്ടിട്ടുള്ളത്. ജനുവരി 14 ന് റിലീസ് ചെയ്യാനിരുന്ന പരാശക്തി ജനുവരി പത്തിലേക്ക് മാറ്റിയതും ശ്രദ്ധിക്കപ്പെട്ടിരുന്നു. എന്നാൽ ഇപ്പോഴിതാ ജന നായകൻ- പരാശക്തി ക്ലാഷ് റിലീസുമായി ബന്ധപ്പെട്ട് പ്രതികരിച്ചിരിക്കുകയാണ് ശിവ കാർത്തികേയൻ.
രണ്ട് സിനിമകളും പൊങ്കലിന് റിലീസ് ചെയ്യുന്നുണ്ടെന്ന് അറിഞ്ഞപ്പോൾ താൻ ഞെട്ടിപ്പോയെന്നും, റിലീസ് മാറ്റാൻ താൻ നിർമ്മാതാവിനെ വിളിച്ചുവെന്നും ശിവ കാർത്തികേയൻ പറയുന്നു. മുപ്പത്തിമൂന്ന് വർഷമായി നമ്മെ വിസ്മയിപ്പിച്ച മനുഷ്യനാണ് വിജയ് എന്നും, എല്ലാവരും ജനുവരി ഒൻപതിന് ജന നായകൻ കാണൂവെന്നും ശിവകാർത്തികേയൻ കൂട്ടിച്ചേർത്തു.
“രണ്ട് സിനിമകളും പൊങ്കലിന് റിലീസ് ചെയ്യുന്നുണ്ടെന്ന് അറിഞ്ഞപ്പോൾ ഞാൻ ഞെട്ടിപ്പോയി. ഞങ്ങളുടെ നിർമ്മാതാവിനെ വിളിച്ച് റിലീസ് തീയതി മാറ്റാൻ കഴിയുമോ എന്ന് ഞാൻ ചോദിച്ചു. എന്നാൽ ചിത്രത്തിനു വേണ്ടി പണം നിക്ഷേപിച്ചവരോട് ‘പരാശക്തി’ പൊങ്കലിന് റിലീസ് ചെയ്യുമെന്ന് അതിനോടകം അറിയിച്ചിരുന്നു. കൂടാതെ, 2026 വേനൽക്കാലത്തേക്ക് മാറ്റിയാൽ തമിഴ്നാട് നിയമസഭാ തെരഞ്ഞെടുപ്പ് കാരണം റിലീസ് ബുദ്ധിമുട്ടാകുകയും ചെയ്യും.” അദ്ദേഹം പറഞ്ഞു. വിജയ്യുടെ മാനേജർ ജഗദീഷിനെയും വിളിച്ച് പ്രശ്നം പരിഹരിക്കാൻ ഞാൻ ശ്രമിച്ചിരുന്നു.” ശിവകാർത്തികേയൻ പറയുന്നു.