ബഹ്റൈനിലെ ഗതാഗതക്കുരുക്ക് ലഘൂകരിക്കുന്നതിന്റെ ഭാഗമായി പ്രത്യേക പദ്ധതിയായ ‘സ്മാർട്ട് കാർ-ഷെയറിങ്’ സംവിധാനത്തിന് ക്യാപിറ്റൽ ട്രസ്റ്റീസ് ബോർഡ് അംഗീകാരം നൽകി. ഒരേ ദിശയിലേക്ക് യാത്ര ചെയ്യുന്ന ഒന്നിലധികം ഉപഭോക്താക്കൾക്ക് ഈ പദ്ധതിയുടെ പ്രയോജനം ലഭ്യമാകും. ഈ സംവിധാനത്തിൽ, ലൈവ് മാപ്പുകളും തത്സമയ അപ്ഡേറ്റുകളും ഉപയോഗിച്ച് യാത്രാ വിവരങ്ങൾ ഒരു ആപ്ലിക്കേഷനിലൂടെ ലഭ്യമാകും.
ബഹ്റൈനുവേണ്ടി പ്രത്യേകം വികസിപ്പിച്ച മൊബൈൽ ആപ്ലിക്കേഷനെ അടിസ്ഥാനമാക്കിയാണ് ഈ സ്മാർട്ട് കാർ-ഷെയറിംഗ് സംവിധാനം പ്രവർത്തിക്കുന്നത്. ഒരേ ദിശയിലേക്ക് യാത്ര ചെയ്യുന്നവർക്ക് ഇത് വലിയ പ്രയോജനമാകും. പ്രത്യേക ലക്ഷ്യസ്ഥാനങ്ങളിലേക്കോ അല്ലെങ്കിൽ ഒരേ റൂട്ടിലുള്ള ജോലിസ്ഥലങ്ങളിലേക്കും സർവകലാശാലകളിലേക്കും പോകുന്ന യാത്രക്കാർക്ക് തങ്ങളുടെ ദൈനംദിന യാത്രകൾ ഇനി പരസ്പരം പങ്കുവെക്കാം. ലൈവ് മാപ്പുകളും തത്സമയ അപ്ഡേറ്റുകളും ഉപയോഗിച്ച്, യാത്ര ചെയ്യുന്നവരുടെ സ്ഥാനവും സമയവും അനുസരിച്ച് ഡ്രൈവർമാരെയും യാത്രക്കാരെയും ആപ്പ് കൃത്യമായി രേഖപ്പെടുത്തും. കൂടാതെ, ഇന്ധനച്ചെലവ് പങ്കുവെക്കുന്നതിനുള്ള സൗകര്യവും ഈ ആപ്ലിക്കേഷനിൽ ലഭ്യമാകും. പരമാവധി ഉപയോക്താക്കളെ ഉൾപ്പെടുത്തി ഈ പദ്ധതി വിജയകരമായി നടപ്പിലാക്കാനാണ് അധികൃതർ ശ്രമിക്കുന്നത്.
ആദ്യ ഘട്ടത്തിൽ, വൻകിട വാണിജ്യ-ഓഫീസ് മേഖലകളിലെ ജീവനക്കാർ, സ്വകാര്യ സർവകലാശാലകളിലെയും യൂണിവേഴ്സിറ്റി ഓഫ് ബഹ്റൈൻ, ബിഐബിഎഫ് പോലുള്ള സ്ഥാപനങ്ങളിലെയും വിദ്യാർഥികൾ, കൂടാതെ ജോലി സമയവും യാത്രാ റൂട്ടുകളും നിശ്ചിതമായിട്ടുള്ള സർക്കാർ-ബാങ്ക് ജീവനക്കാർ എന്നിവരെയാണ് ഈ പദ്ധതി ലക്ഷ്യമിടുന്നത്. ഈ പുതിയ സംവിധാനം ബഹ്റൈനിൽ ചെലവ് കുറഞ്ഞ യാത്രാരീതിക്ക് തുടക്കം കുറിക്കുമെന്നാണ് പ്രതീക്ഷ. ബോർഡ് അംഗം ഡോ. ബഷാർ അഹമ്മദി സമർപ്പിച്ച, സ്മാർട്ട്-സുസ്ഥിര പങ്കാളിത്ത ഗതാഗതത്തിനുള്ള ഈ നിർദ്ദേശം വിശദമായ ചർച്ചകൾക്ക് ശേഷം ഏകകണ്ഠമായി അംഗീകരിച്ചു. തുടർന്ന് അവലോകനത്തിനായി ഇത് മുനിസിപ്പാലിറ്റി കാര്യ-കൃഷി മന്ത്രി വഈൽ അൽ മുബാറക്കിനും പിന്നീട് ഗതാഗത-ടെലികമ്യൂണിക്കേഷൻസ് മന്ത്രി ഷെയ്ഖ് ഡോ. അബ്ദുല്ല ബിൻ അഹമ്മദ് ആൽ ഖലീഫയ്ക്കും കൈമാറിയിട്ടുണ്ട്. ഇത് തലസ്ഥാനത്തിന്റെ വിശാലമായ ഗതാഗത പദ്ധതികളിൽ ഉൾപ്പെടുത്തും.
