ദക്ഷിണാഫ്രിക്കയ്‌ക്കെതിരായ ടെസ്റ്റ് പരമ്പരയിലെ സമ്പൂർണ്ണ തോൽവിക്ക് പിന്നാലെ ഇന്ത്യൻ പരിശീലകൻ ഗൗതം ഗംഭീർ പ്രതികരണവുമായി രംഗത്തെത്തി. പരാജയത്തിന് ശേഷമുള്ള തൻ്റെ ആദ്യ പ്രതികരണത്തിൽ, കുറ്റം എല്ലാവരിലും ഉണ്ടെന്നും, അത് തന്നിൽ നിന്ന് തന്നെയാണ് ആരംഭിക്കുന്നത് എന്നും ഗംഭീർ സമ്മതിച്ചു.
താൻ ഇന്ത്യൻ ടീമിന്റെ പരിശീലക സ്ഥാനത്ത് തുടരാൻ അർഹനാണോ അല്ലയോ എന്ന് തീരുമാനിക്കേണ്ടത് ബിസിസിഐ ആണെന്നും അദ്ദേഹം വാർത്താ സമ്മേളനത്തിൽ വ്യക്തമാക്കി. എന്നാൽ, തൻ്റെ പരിശീലക കാലയളവിൽ ടീം നേടിയ നേട്ടങ്ങൾ ചൂണ്ടിക്കാട്ടി അദ്ദേഹം പ്രതിരോധം തീർത്തു. “എൻ്റെ ഭാവി തീരുമാനിക്കേണ്ടത് ബിസിസിഐയാണ്. പക്ഷേ ഇംഗ്ലണ്ടിൽ നിങ്ങൾക്ക് മികച്ച ഫലം നൽകിയതും ചാംപ്യൻസ് ട്രോഫി ജയിച്ചപ്പോൾ പരിശീലകനായിരുന്നതും ഞാൻ തന്നെയാണ്,” ചാംപ്യൻസ് ട്രോഫി കിരീട നേട്ടത്തെയും ഈ വർഷം ആദ്യം ഇംഗ്ലണ്ടിനെതിരെ അവരുടെ സ്വന്തം മൈതാനത്ത് നേടിയ 2-2 സമനിലയും ചൂണ്ടിക്കാട്ടി ഗംഭീർ പറഞ്ഞു.
ബാറ്റിങ് തകർച്ച അംഗീകരിക്കാനാവില്ലെന്ന് അദ്ദേഹം സമ്മതിച്ചു. “നമ്മൾ നന്നായി കളിക്കേണ്ടതുണ്ട്. 95/1 എന്ന നിലയിൽ നിന്ന് 122/7 വരെ എത്തിയത് ഒട്ടും അംഗീകരിക്കാൻ കഴിയാത്തതാണ്. ഒരു വ്യക്തിയെയോ, ഏതെങ്കിലും പ്രത്യേക ഷോട്ടിനെയോ കുറ്റപ്പെടുത്തുന്നതിൽ കാര്യമില്ല. വീഴ്ചകൾ എല്ലാവർക്കും സംഭവിച്ചിട്ടുണ്ട്,” ഗംഭീർ കൂട്ടിച്ചേർത്തു.
ഗംഭീറിൻ്റെ കീഴിൽ, ഇന്ത്യ ആകെ 18 ടെസ്റ്റുകൾ കളിച്ചതിൽ 10 എണ്ണത്തിലും തോറ്റിട്ടുണ്ട്. കഴിഞ്ഞ വർഷം ന്യൂസിലൻഡിനെതിരെയും ഇപ്പോൾ ദക്ഷിണാഫ്രിക്കയ്‌ക്കെതിരെയും ഹോം പരമ്പരയിൽ ടീം പരാജയപ്പെട്ടു. ഗുവാഹത്തിയിൽ സംഭവിച്ച തോൽവി, റൺസിന്റെ അടിസ്ഥാനനത്തിലുള്ള ഇന്ത്യയുടെ ചരിത്രത്തിലെ ഏറ്റവും വലിയ തോൽവിയായിരുന്നു.