കേരളത്തിൽ നിന്നുള്ള രണ്ട് ഒന്നാം വർഷ ബി.എസ്‌സി. നഴ്സിംഗ് വിദ്യാർത്ഥിനികൾ ചിക്കബനവാര റെയിൽവേ സ്റ്റേഷന് സമീപം വന്ദേ ഭാരത് എക്സ്പ്രസ് ട്രെയിനിടിച്ച് ദാരുണമായി മരണപ്പെട്ട വാർത്ത നാടിനെ നടുക്കിയ ഒന്നായിരുന്നു. അതിവേഗത്തിൽ വന്ന ട്രെയിൻ, ട്രാക്കുകൾ മുറിച്ചുകടക്കുകയായിരുന്ന വിദ്യാർത്ഥിനികളെ ഇടിച്ചുതെറിപ്പിക്കുകയായിരുന്നു എന്നതായിരുന്നു പ്രാഥമിക നിഗമനം.
പത്തനംതിട്ട സ്വദേശികളായ സ്റ്റെർലിൻ എലിസ ഷാജി (19), ജസ്റ്റിൻ ജോസഫ് (20) എന്നിവരാണ് മരിച്ചത്. സപ്തഗിരി കോളേജിൽ പഠിച്ചിരുന്ന ഇരുവരും അടുത്തുള്ള പേയിംഗ് ഗസ്റ്റ് അക്കോമഡേഷനിലാണ് താമസിച്ചിരുന്നത്. അപകടത്തിൽ ഇരുവരുടെയും മൃതദേഹങ്ങൾ ട്രാക്കുകളിൽ ഛിന്നഭിന്നമായ നിലയിലാണ് കണ്ടെത്തിയത്.
റെയിൽവേ ഉദ്യോഗസ്ഥരിൽ നിന്നും പോലീസിൽ നിന്നും ലഭിക്കുന്ന പ്രാഥമിക വിവരം അനുസരിച്ച്, വിദ്യാർത്ഥികൾ താമസസ്ഥലത്തേക്ക് മടങ്ങുന്നതിനിടെ ട്രാക്ക് മുറിച്ചുകടക്കുമ്പോഴാണ് അപകടമുണ്ടായത്. വന്ദേ ഭാരത് ട്രെയിൻ അതിവേഗത്തിൽ വന്നപ്പോഴാണ് ഇരുവരും ട്രാക്കിലേക്ക് കടന്നതെന്ന് റെയിൽവേ ഉദ്യോഗസ്ഥർ സ്ഥിരീകരിച്ചു.
അപകട സാധ്യത തന്നെയാണ് അന്വേഷണ ഉദ്യോഗസ്ഥർ പ്രാഥമികമായി സംശയിക്കുന്നത്. ആത്മഹത്യാ സാധ്യത തള്ളിക്കളയുന്നില്ലെങ്കിലും, നിലവിൽ എല്ലാ കോണുകളും പോലീസ് പരിശോധിച്ചു വരികയാണ്.
ബെംഗളൂരു റൂറൽ റെയിൽവേ പോലീസിലെയും യശ്വന്ത്പൂർ റെയിൽവേ പോലീസ് സ്റ്റേഷനിലെയും ഉദ്യോഗസ്ഥർ സംഭവത്തിൽ ഒരു യു.ഡി.ആർ. (Unnatural Death Report) കേസ് രജിസ്റ്റർ ചെയ്തിട്ടുണ്ട്.
മരിച്ച വിദ്യാർത്ഥികളുടെ നീക്കങ്ങളെയും പശ്ചാത്തലത്തെയും കുറിച്ചുള്ള വിവരങ്ങൾ പോലീസ് വിശദമായി ശേഖരിക്കുന്നുണ്ട്. സംഭവത്തിലേക്ക് നയിച്ച സാഹചര്യങ്ങളെക്കുറിച്ച് റെയിൽവേ വകുപ്പ് അധികൃതരും ആഭ്യന്തര പരിശോധന ആരംഭിച്ചിട്ടുണ്ട്. മൃതദേഹങ്ങൾ എം.എസ്. രാമയ്യ ആശുപത്രിയിലേക്ക് മാറ്റി.