ഇന്ത്യൻ റെയിൽവേയുടെ ട്രെയിനുകളിൽ മാംസാഹാരമായി “ഹലാൽ രീതിയിൽ സംസ്കരിച്ച മാംസം മാത്രമേ” വിളമ്പുന്നുള്ളൂ എന്ന വിവാദത്തിൽ നിലപാട് വ്യക്തമാക്കി റെയിൽവേ ബോർഡ്. ഈ ആരോപണം “അന്യായമായ വിവേചനവും” “മനുഷ്യാവകാശ ലംഘനവുമാണ്” എന്ന് ചൂണ്ടിക്കാട്ടി ലഭിച്ച പരാതിയിൽ ദേശീയ മനുഷ്യാവകാശ കമ്മീഷൻ (NHRC) നോട്ടീസ് നൽകിയിരുന്നു. ഇതിന് മറുപടിയായി, ട്രെയിനുകളിൽ ഹലാൽ സാക്ഷ്യപ്പെടുത്തിയ ഭക്ഷണം വിൽക്കുന്നതിന് ഔദ്യോഗിക വ്യവസ്ഥയില്ലെന്ന് റെയിൽവേ ബോർഡ് എൻ.എച്ച്.ആർ.സി.യെ അറിയിച്ചു.
ഇന്ത്യൻ റെയിൽവേയുടെ ഔദ്യോഗിക നിലപാടല്ല ഈ ആരോപണം പ്രതിഫലിപ്പിക്കുന്നതെന്നും, എല്ലാ ഭക്ഷ്യവസ്തുക്കൾക്കും ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) നിശ്ചയിച്ചിട്ടുള്ള മാനദണ്ഡങ്ങൾ മാത്രമാണ് പാലിക്കുന്നതെന്നും റെയിൽവേ ബോർഡ് കമ്മീഷന് നൽകിയ മറുപടിയിൽ വ്യക്തമാക്കി.
പരമ്പരാഗതമായി മാംസക്കച്ചവടത്തിൽ ഏർപ്പെട്ടിട്ടുള്ള ഹിന്ദു ദലിത് സമുദായങ്ങളിൽ നിന്നുള്ള ആളുകളെ ഇത്തരമൊരു ആചാരം ഒഴിവാക്കുന്നുവെന്നും, ഇത് അവരുടെ ഉപജീവനാവകാശങ്ങളെയും തുല്യ അവസരങ്ങളെയും ബാധിക്കുന്നുവെന്നും പരാതിയിൽ പറയുന്നു.
റെയിൽവേ ബോർഡ് ഉദ്യോഗസ്ഥൻ പറഞ്ഞ പ്രധാന കാര്യങ്ങൾ ഇവയാണ്..
ഇന്ത്യൻ റെയിൽവേയും ഐ.ആർ.സി.ടി.സി.യും അവരുടെ എല്ലാ ഭക്ഷ്യ ഉൽപ്പന്നങ്ങൾക്കും ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) മാർഗ്ഗനിർദ്ദേശങ്ങൾ മാത്രമാണ് പാലിക്കുന്നത്. കാറ്ററിംഗ് സിസ്റ്റത്തിൽ പ്രത്യേക തരം മാംസ സംസ്കരണം (ഹലാൽ പോലുള്ളവ) നിർദ്ദേശിക്കുകയോ നിർബന്ധമാക്കുകയോ ചെയ്യുന്നില്ല. ട്രെയിനുകളിൽ ഹലാൽ സാക്ഷ്യപ്പെടുത്തിയ ഭക്ഷണം വിളമ്പുന്നതിന് ഔദ്യോഗികമായ ഒരു വ്യവസ്ഥയുമില്ല.
ഇതേ വിഷയം അടുത്തിടെ മുഖ്യ വിവരാവകാശ കമ്മീഷൻ്റെ (CIC) മുമ്പാകെ വന്നിരുന്നതായും റെയിൽവേ അധികൃതർ ചൂണ്ടിക്കാട്ടി. ട്രെയിനുകളിൽ ഹലാൽ രീതിയിൽ സംസ്കരിച്ച മാംസം വിതരണം ചെയ്യുന്നുണ്ടോ എന്ന വിവരാവകാശ ചോദ്യത്തിന് മറുപടിയായി, ഹലാൽ സാക്ഷ്യപ്പെടുത്തിയ ഭക്ഷണം വിളമ്പുന്നില്ലെന്ന് ബോർഡ് സി.ഐ.സി. മുമ്പാകെ നിലപാട് വ്യക്തമാക്കിയിരുന്നു.