പാലക്കാട്: രാഹുൽ മാങ്കൂട്ടത്തിലിനെതിരെ ഇപ്പോള് കേസെടുത്തുകൊണ്ടുള്ളത് സര്ക്കാരിന്റെ നാടകമാണെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. നാലു മാസം മുമ്പ് തന്നെ സര്ക്കാരിന് സ്വമേധയാ കേസെടുക്കാമായിരുന്നു. ശബരിമല വിഷയം മറയ്ക്കാനാണ് ഇപ്പോള് രാഹുൽ വിഷയം കൊണ്ടുവന്നതെന്നും അദ്ദേഹം പറഞ്ഞു.
അതേസമയം മോശം വ്യക്തിയാണെന്ന് കോണ്ഗ്രസ് നേതൃത്വം അറിഞ്ഞിട്ടും രാഹുൽ മാങ്കൂട്ടത്തിലിനെ പാലക്കാട് കൊണ്ടുവന്നിറക്കി. ഒരു മോശം വ്യക്തിയെ എംഎൽഎയായി കോണ്ഗ്രസ് പാലക്കാട്ടെ ജനങ്ങളുടെ തലയിൽ കെട്ടിവെച്ചുവെന്നും അദ്ദേഹം ആരോപിച്ചു.
ശബരിമല സ്വര്ണകൊള്ളയിൽ കോണ്ഗ്രസിനും പങ്കുണ്ടെന്നും അദ്ദേഹം പറഞ്ഞു. കോണ്ഗ്രസിന്റെ സഹായത്തോടെയാണ് ഒരു ദല്ലാള് കൊള്ളയുടെ ഭാഗമായത്. മസാല ബോണ്ടിൽ മുഖ്യമന്ത്രിക്കെതിരായ ഇഡി സമന്സ് അന്വേഷണത്തിന്റെ ഭാഗമായാണെന്നും നടന്നത് ഗുരുതര ക്രമക്കേടാണെന്നും എല്ലാം അന്വേഷിച്ച് കണ്ടെത്തണമെന്നും രാജീവ് ചന്ദ്രശേഖര് പറഞ്ഞു. മുഖ്യമന്ത്രിക്കെതിരെ തുടരന്വേഷണം ഉണ്ടാകും. ഇഡിയുടേത് രാഷ്ട്രീയ നീക്കമെന്ന് പറയുന്നത് ശുദ്ധ മണ്ടത്തരമാണ്. ആര്ക്കാണ് 21 കോടി കൊടുത്തതെന്ന് അന്വേഷിക്കണമെന്നും രാജീവ് ചന്ദ്രശേഖര് പറഞ്ഞു. തിരുവനന്തപുരം ഒളിമ്പിക്സിന് വേദിയാകുമെന്ന് പ്രഖ്യാപിച്ചതിൽ പരിഹസിക്കേണ്ടവര് പരിഹസിക്കെട്ടയെന്നും ഞങ്ങള്ക്ക് ഭരണം തന്നാൽ അപ്പോള് കാണാമെന്നും രാജീവ് ചന്ദ്രശേഖര് പറഞ്ഞു.
.