ഉപഭോക്തൃ അടിത്തറ വിപുലീകരിക്കുന്നതിന്റെ ഭാഗമായി, വിദ്യാർത്ഥികളെ ലക്ഷ്യമിട്ട് ഭാരത് സഞ്ചാർ നിഗം ലിമിറ്റഡ് (ബിഎസ്എൻഎൽ) ഒരു പുതിയ സ്പെഷ്യൽ റീചാർജ് പ്ലാൻ അവതരിപ്പിച്ചു. 251 രൂപ മുടക്കിയാൽ 28 ദിവസത്തെ വാലിഡിറ്റിയിൽ കോളിംഗ്, ഡാറ്റ, എസ്എംഎസ് സേവനങ്ങൾ ലഭ്യമാക്കുന്നതാണ് ഈ പുതിയ പ്ലാൻ. ഈ ആകർഷകമായ ഓഫർ നവംബർ 14 മുതൽ ഡിസംബർ 13 വരെ മാത്രമേ ലഭ്യമാകൂ എന്നും ബിഎസ്എൻഎൽ അറിയിച്ചിട്ടുണ്ട്. വിദ്യാർത്ഥികളെ തങ്ങളുടെ നെറ്റ് വർക്കിലേക്ക് ആകർഷിക്കാനുള്ള ബിഎസ്എൻഎല്ലിന്റെ വിശാലമായ ശ്രമങ്ങളുടെ ഭാഗമായാണ് ഈ റീചാർജ് പാക്കേജ്.
ബിഎസ്എൻഎൽ അവതരിപ്പിച്ച 251 രൂപയുടെ സ്റ്റുഡന്റ് സ്പെഷ്യൽ റീചാർജ് പ്ലാൻ മികച്ച ആനുകൂല്യങ്ങളാണ് വാഗ്ദാനം ചെയ്യുന്നത്. ഈ പ്ലാനിൽ ഉപയോക്താക്കൾക്ക് 28 ദിവസത്തെ വാലിഡിറ്റിയിൽ അൺലിമിറ്റഡ് കോളുകൾ ലഭ്യമാകും. കൂടാതെ, ആകെ 100 GB ഡാറ്റ ഉപയോഗിക്കാനുള്ള സൗകര്യവും, പ്രതിദിനം 100 എസ്എംഎസുകളും ഇതിന്റെ പ്രധാന സവിശേഷതകളാണ്. ഈ പ്രത്യേക ഓഫർ ലഭിക്കുന്നതിന് ഉപഭോക്താക്കൾക്ക് ബിഎസ്എൻഎൽ സെൽഫ്‌കെയർ ആപ്പ് വഴി റീചാർജ് ചെയ്യാവുന്നതാണ്. ഈ സ്റ്റുഡന്റ് സ്പെഷ്യൽ റീചാർജിന്റെ വാലിഡിറ്റി 2025 ഡിസംബർ 13 വരെ മാത്രമായിരിക്കും.
അതേസമയം 4ജി വ്യാപനത്തിലൂടെ തിരിച്ചുവരവിനൊരുങ്ങുന്ന ബിഎസ്എൻഎൽ അടുത്തിടെ 225 രൂപയുടെ ഒരു ആകർഷകമായ പ്രീപെയ്ഡ് റീചാർജ് പ്ലാൻ അവതരിപ്പിച്ചു. ഈ പ്ലാനിന്റെ പ്രധാന സവിശേഷത 30 ദിവസത്തെ വാലിഡിറ്റിയിൽ പരിധിയില്ലാത്ത കോളുകളും പ്രതിദിനം 2.5 GB ഡാറ്റയുമാണ്. കൂടാതെ, ഉപയോക്താക്കൾക്ക് ദിവസവും 100 എസ്എംഎസുകളും ലഭിക്കും. ഒരു മാസം വാലിഡിറ്റിയോടെ പ്രതിദിനം 2.5 GB ഡാറ്റ ഇത്രയും കുറഞ്ഞ നിരക്കിൽ മറ്റൊരു ടെലികോം ഓപ്പറേറ്റർമാരും നൽകുന്നില്ല എന്നതിനാൽ, മത്സരം നിറഞ്ഞ വിപണിയിൽ കളം പിടിക്കാനുള്ള ബിഎസ്എൻഎല്ലിന്റെ തീവ്ര ശ്രമങ്ങളുടെ ഭാഗമാണ് ഈ പ്ലാൻ.