തമ്മനത്ത് വാട്ടർ ടാങ്ക് തകർന്നതിനെ തുടർന്ന് കോർപറേഷൻ പരിധിയിൽ ജലദൗർലഭ്യം ഉണ്ടാകാതിരിക്കാനുള്ള നടപടികൾ കാര്യക്ഷമമായി മുന്നോട്ടു പോകുന്നു.
ഇതുസംബന്ധിച്ച് ജില്ലാ കളക്ടർ ജി.പ്രിയങ്കയുടെ അധ്യക്ഷതയിൽ ഓൺലൈൻ ആയി ചേർന്ന ബന്ധപ്പെട്ട വകുപ്പ് പ്രതിനിധികളുടെ യോഗം സ്ഥിതിഗതികൾ വിലയിരുത്തി. നിലവിൽ ഗൗരവതരമായ പരാതികൾ ഒന്നും തന്നെ ലഭിച്ചിട്ടില്ല.
ചേരാനെല്ലൂർ പ്രദേശത്ത് വാർഡുകളിൽ യഥാസമയം വെള്ളം വിതരണം ചെയ്യുന്നുണ്ടെന്ന് ഗ്രാമ പഞ്ചായത്ത് സെക്രട്ടറി അറിയിച്ചു.
നവംബർ 10 ന് പുലർച്ചെ വാട്ടർ അതോറിറ്റിയുടെ 68 ലക്ഷം ലിറ്ററിന്റെ രണ്ട് ടാങ്കുകളിൽ ഒന്നിന്റെ ഭിത്തി തകർന്നിരുന്നു. ഇതേ തുടർന്നുണ്ടായേക്കാവുന്ന ജലദൗർലഭ്യം പരിഹരിക്കാൻ അടിയന്തിര നടപടികൾ സ്വീകരിച്ചിരുന്നു.
പുതിയ 35 ലക്ഷം ലിറ്റർ ടാങ്ക് വാട്ടർ അതോറിറ്റി വക സ്ഥലത്ത് നിർമിക്കുന്നതിനുള്ള നടപടികൾ ആരംഭിച്ചിട്ടുണ്ട്. 12 കോടിയാണ് ഇതിന്റെ എസ്റ്റിമേറ്റ്. മണ്ണിന്റെ ബലം വർധിപ്പിക്കുന്നതുൾപ്പെടെയുള്ള പ്രവർത്തനങ്ങൾക്ക് ഒരു കോടിയിൽ താഴെ എസ്റ്റിമേറ്റ് ആണ് തയാറാക്കുന്നത്.
ഇപ്പോൾ പേട്ട ഭാഗത്ത് ജലവിതരണ മാർഗത്തിൽ ഉണ്ടായിട്ടുള്ള തടസം പരിഹരിക്കാൻ അടിയന്തിര നടപടി സ്വീകരിക്കാൻ ജില്ലാ കളക്ടർ നിർദേശം നൽകി. ഇക്കാര്യത്തിൽ ദേശീയപാതാ അതോറിറ്റിയുടെ സഹകരണം ആവശ്യമാണ്.
പച്ചാളത്ത് അമൃത് പദ്ധതിയിൽപ്പെടുത്തിയിൽ ഉൾപ്പെടുത്തിയിട്ടുള്ള വാട്ടർ ടാങ്കിന്റെ നിർമാണത്തിന് കോർപറേഷൻ ഭാഗത്ത് നിന്നുള്ള അനുബന്ധ നടപടികൾ അടിയന്തിരമായി പൂർത്തിയാക്കാനും ജില്ലാ കളക്ടർ നിർദേശം നൽകി. ഇവിടെ നിന്ന് ജലവിതരണ മാർഗത്തിനായുള്ള 700 മീറ്റർ ഭാഗം കോർപറേഷന്റെ പരിധിയിലാണ് വരുന്നത്.
യോഗത്തിൽ ദുരന്ത നിവാരണ വിഭാഗം ഡെപ്യൂട്ടി കളക്ടർ കെ. മനോജ്, കോർപർഷൻ സെക്രട്ടറി ഷിബു, ദേശീയ പാത അതോറിറ്റി , വാട്ടർ അതോറിറ്റി പ്രതിനിധികൾ തുടങ്ങിയവർ പങ്കെടുത്തു.