ഫ്രഷ്കട്ട് സമരത്തെത്തുടർന്നുണ്ടായ അക്രമങ്ങളുടെ ഗൂഢാലോചന അടക്കമുള്ള കേസുകളിൽ പ്രതിയായ സമരസമിതി ചെയർമാൻ ബാബു കുടുക്കിലിനായുള്ള അന്വേഷണം പോലീസ് ഊർജിതമാക്കി. നിലവിൽ ഒളിവിൽ കഴിയുന്ന ബാബു, തദ്ദേശ തിരഞ്ഞെടുപ്പിൽ സ്ഥാനാർത്ഥിയായി മത്സരിക്കുന്നതിന് മുന്നോടിയായി രേഖകൾ അറ്റസ്റ്റ് ചെയ്യാൻ ഒരു ഗസറ്റഡ് ഓഫീസറുടെ മുന്നിൽ ഹാജരായതോടെയാണ് പോലീസിന് നിർണായക വിവരങ്ങൾ ലഭിച്ചത്.
നാമനിർദേശ പത്രിക സമർപ്പിക്കുന്നതിനായി രേഖകൾ അറ്റസ്റ്റ് ചെയ്യാനെത്തിയ ബാബുവിന് സഹായങ്ങൾ നൽകിയ മുസ്ലിം ലീഗ് ജില്ലാ പ്രവർത്തക സമിതി അംഗം ഹാഫിസ് റഹ്മാനെ പോലീസ് ചോദ്യം ചെയ്തതിൽ നിന്നാണ് നിർണായക വിവരങ്ങൾ ലഭിച്ചത്.
നേപ്പാൾ വഴി നാട്ടിലേക്ക്
ലുക്ക് ഔട്ട് നോട്ടീസ് നിലനിൽക്കുന്നതിനാൽ രാജ്യത്തെ വിമാനത്താവളങ്ങളിൽ ഇറങ്ങിയാൽ അറസ്റ്റ് ചെയ്യപ്പെടും എന്ന് മനസ്സിലാക്കിയ ബാബു കുടുക്കിൽ, നേപ്പാളിൽ എത്തി അവിടെ നിന്ന് റോഡ് മാർഗം സഞ്ചരിച്ചാണ് നാട്ടിൽ തിരിച്ചെത്തിയതെന്ന് അന്വേഷണത്തിൽ വ്യക്തമായി.
ഫ്രഷ് കട്ട് മാലിന്യ പ്ലാന്റ് പരിസരത്ത് ഒക്ടോബർ 21-നാണ് സമരക്കാരും പോലീസും തമ്മിൽ ഏറ്റുമുട്ടിയത്. നാട്ടുകാർ നടത്തിയ പ്രതിഷേധം സംഘർഷത്തിൽ കലാശിക്കുകയും സമരക്കാർ പ്ലാന്റിന് തീവെക്കുകയും ഫ്രഷ് കട്ടിന്റെ മാലിന്യ ശേഖരണ വാഹനങ്ങൾക്ക് നേരെ കല്ലെറിയുകയും ചെയ്തിരുന്നു. കല്ലേറിൽ നിരവധി പോലീസുകാർക്ക് പരിക്കേൽക്കുകയും ചെയ്തിരുന്നു.