ഇന്ത്യയും പാകിസ്ഥാനും തമ്മിലുള്ള ക്രിക്കറ്റ് മത്സരങ്ങളിലെ ‘ഹസ്തദാന വിവാദം’ വീണ്ടും പുകയുന്നു. ഇന്ത്യൻ താരങ്ങൾ ഹസ്തദാനത്തിന് തയ്യാറല്ലെങ്കിൽ പാകിസ്ഥാനും അതിൽ നിർബന്ധമില്ലെന്ന് പാകിസ്ഥാൻ ക്രിക്കറ്റ് ബോർഡ് (പിസിബി) ചെയർമാനും ഏഷ്യൻ ക്രിക്കറ്റ് കൗൺസിൽ (എസിസി) അധ്യക്ഷനുമായ മുഹ്സിൻ നഖ്വി വ്യക്തമാക്കി. ഇന്ത്യ സ്വീകരിക്കുന്ന അതേ നിലപാടായിരിക്കും പാകിസ്ഥാനും തിരിച്ചു നൽകുകയെന്ന് അദ്ദേഹം ലാഹോറിൽ നടന്ന വാർത്താസമ്മേളനത്തിൽ തുറന്നടിച്ചു.
നഖ്വിയുടെ വാക്കുകൾ
“ഇന്ത്യക്ക് കൈ തരാൻ താത്പര്യമില്ലെങ്കിൽ ഞങ്ങൾക്ക് അങ്ങോട്ട് പോയി കൈ കൊടുക്കാൻ വലിയ ആഗ്രഹമൊന്നുമില്ല. അവർ എന്ത് നിലപാട് സ്വീകരിക്കുന്നുവോ അതിന് അനുസരിച്ച് തന്നെ പാകിസ്ഥാനും പ്രതികരിക്കും. ഇന്ത്യ ഒന്ന് ചെയ്യുമ്പോൾ പിന്നിലേക്ക് മാറി നിൽക്കാൻ ഞങ്ങളില്ല. കളിയിൽ രാഷ്ട്രീയം കലർത്താൻ ഉദ്ദേശിക്കുന്നില്ലെന്ന് പാക് പ്രധാനമന്ത്രി തന്നെ എന്നെ വിളിച്ച് പറഞ്ഞിട്ടുണ്ട്. തുടക്കം മുതൽ പാകിസ്ഥാന്റെ നിലപാടും അത് തന്നെയാണ്.”
വിവാദത്തിന്റെ തുടക്കം
കഴിഞ്ഞ സെപ്റ്റംബറിൽ നടന്ന ഏഷ്യാ കപ്പ് ടി20 മത്സരത്തിനിടെയാണ് വിവാദങ്ങളുടെ തുടക്കം. അതിർത്തിയിലെ ഭീകരാക്രമണങ്ങളുടെ പശ്ചാത്തലത്തിൽ ഇന്ത്യൻ താരങ്ങൾ പാക് താരങ്ങൾക്ക് ഹസ്തദാനം നൽകാൻ വിസമ്മതിച്ചിരുന്നു. തുടർന്ന് നടന്ന വനിതാ ലോകകപ്പ്, അണ്ടർ 19 ഏഷ്യാ കപ്പ്, റൈസിംഗ് സ്റ്റാർസ് ഏഷ്യാ കപ്പ് എന്നിവയിലെല്ലാം ഇന്ത്യൻ താരങ്ങൾ പാക് താരങ്ങളുമായി ഹസ്തദാനം ചെയ്യാതെ മൈതാനം വിട്ടത് വലിയ ചർച്ചയായിരുന്നു. ഇതിന് അതേ നാണയത്തിൽ മറുപടി നൽകുമെന്നാണ് പിസിബി ചെയർമാൻ ഇപ്പോൾ പ്രഖ്യാപിച്ചിരിക്കുന്നത്