പട്ന വിമാനത്താവളത്തില്‍ ആടിയുലഞ്ഞ് വിമാനം, ദുരന്തം ഒഴിവായത് തലനാരിഴയ്ക്ക്

പട്‌ന: പട്‌ന വിമാനത്താവളത്തില്‍ വിമാനം ലാന്‍ഡ് ചെയ്യുന്നതിനിടെ കോക്പിറ്റിലേക്ക് ലേസർ രശ്മികൾ അടിച്ചതിനെ തുടർന്ന് വിമാനം ആടിയുലഞ്ഞു. തലനാരിഴയ്ക്ക് ആണ് വൻ ദുരന്തം ഒഴിവായത്. പുണെയില്‍ നിന്ന് പട്‌നയിലേക്ക് വന്ന വിമാനം ലാന്‍ഡ് ചെയ്യുന്ന സമയത്ത് കോക്ക്പിറ്റിലേക്ക് ലേസര്‍ രശ്മികള്‍ അടിച്ചതാണ് അപകടകരമായ സാഹചര്യത്തിലേക്ക് നയിച്ചത്. വ്യാഴാഴ്ച വൈകീട്ടായിരുന്നു സംഭവം.

വിമാനത്തിന്റെ ലാന്‍ഡിങ് നടപടികള്‍ ആരംഭിച്ചതിന് ശേഷമാണ് സംഭവം നടക്കുന്നത്. സമീപത്തു നിന്ന് ലേസര്‍ രശ്മികള്‍ കോക്ക്പിറ്റിലേക്ക് അടിക്കുകയായിരുന്നു. പിന്നാലെ വിമാനം നിലതെറ്റി ആടിയുലഞ്ഞു. എന്നാല്‍ പൈലറ്റ് കൃത്യമായി ഇടപെട്ടതിനാല്‍ ദുരന്തം ഒഴിവാകുകയായിരുന്നു.

സംഭവത്തില്‍ വന്‍ സുരക്ഷാ വീഴ്ച ഉണ്ടായതാണ് വിലയിരുത്തല്‍. എയര്‍പോര്‍ട്ട് പോലീസ് അന്വേഷണം നടത്തുന്നുണ്ട്. സമീപത്ത് നടക്കുന്ന ഏതെങ്കിലും പരിപാടിക്കിടയില്‍ നിന്ന് ആരെങ്കിലും ലേസര്‍ രശ്മി അടിച്ചതാകാമെന്നാണ് സംശയിക്കുന്നത്. ഡിജിസിഐയും അന്വേഷണം പ്രഖ്യാപിച്ചിട്ടുണ്ട്. നിലവില്‍ കൂടുതല്‍ വിവരങ്ങള്‍ ലഭ്യമായിട്ടില്ല.