വിവാഹ വാഗ്ദാനം നൽകി പീഡനം, വനിതാ ഡോക്ടറുടെ പരാതിയിൽ ഐപിഎസ് ഓഫീസർക്കെതിരെ കേസെടുത്ത് പോലീസ്

മുംബൈ: വിവാഹ വാഗ്ദാനം നൽകി ഇരുപത്തിയെട്ടുകാരിയായ ഡോക്ടറെ പീഡിപ്പിച്ചെന്ന പരാതിയിൽ ഐപിഎസ് ഓഫീസർക്കെതിരെ കേസെടുത്ത് പോലീസ്. നാഗ്പുരിലാണ് സംഭവം. സാമൂഹിക മാധ്യമങ്ങളിലൂടെയാണ് യുവതി യുവാവിനെ പരിചയപ്പെട്ടത്. തുടർന്ന് സൗഹൃദത്തിലായി. യുവാവ് യുപിഎസ്‌സി പരീക്ഷയ്ക്കും യുവതി എംബിബിഎസ് കോഴ്‌സിനും പഠിക്കുന്ന സമയത്താണ് പരിചയപ്പെട്ടത്. സൗഹൃദം പിന്നീട് പ്രണയത്തിലെത്തി. വിവാഹം കഴിക്കാമെന്ന് പറഞ്ഞ് യുവാവ് ഇരുപത്തിയെട്ടുകാരിയെ പല സ്ഥലങ്ങളിൽ കൊണ്ട് പോയി പീഡിപ്പിച്ചെന്നാണ് യുവതി പോലീസിൽ നൽകിയ പരാതിയിൽ പറയുന്നത്.

ഐപിഎസ് ലഭിച്ചതോടെ ഇയാൾ യുവതിയെ ഒഴിവാക്കി. മാനസികമായും ശാരീരികമായും അയാൾ പീഡിപ്പിച്ചു. ജാതി പറഞ്ഞ് അധിക്ഷേപിക്കുകയും ചെയ്തു. ഇതേത്തുടർന്നാണ് പോലീസിൽ പരാതി നൽകിയതെന്നും യുവതി പറഞ്ഞു. ഇമാംവാഡ പോലീസ് സ്റ്റേഷനിലെത്തി യുവതി നേരിട്ട് പരാതി നൽകുകയായിരുന്നു.