സ്‌കൈ ഡൈനിംഗ് ഇനി കേരളത്തിലും

കാസർകോട്: ദൃശ്യഭംഗി ആസ്വദിച്ച് ഭക്ഷണം കഴിക്കാൻ കേരളത്തിലും അവസരമൊരുങ്ങുകയാണ്. കാസർഗോഡ് ബേക്കൽ ബീച്ചിലെത്തുന്ന സന്ദർശകർക്ക് അവിസ്മരണീയമായ ആകാശ വിരുന്നാണ് പാർക്ക് അധികൃതർ ഒരുക്കിയത്. സംസ്ഥാനത്ത് തന്നെ ആദ്യമായാണ് സ്‌കൈ ഡൈനിംഗ് അവതരിപ്പിച്ചിരിക്കുന്നത്. ഇതിലൂടെ ടൂറിസം രംഗത്ത് വിപ്ലവകരമായ മാറ്റം വരുത്താനാകുമെന്നാണ് കരുതുന്നത്. കൂറ്റൻ യന്ത്രക്കൈയിൽ142 അടി ഉയരത്തിലുള്ള പ്രത്യേക ഇരിപ്പിടമാണ് ഒരുക്കിയിരിക്കുന്നത്. തൂണികിടക്കുന്ന പേടകത്തിൽ കയറി ആകാശ വിസ്മയം ആസ്വദിക്കാനും രുചിയേറിയ ഭക്ഷണം കഴിക്കുവാനും അക്ഷമയോടെ കാത്തിരിക്കുകയാണ് മലയാളികൾ. വ്യത്യസ്തവും നൂതനവുമായ സ്‌കൈ ഡൈനിംഗ് അനുഭവിക്കാൻ നിരവധി പേരാണ് ബേക്കൽ ബീച്ച് പാർക്കിലെത്തുന്നത്.

തൂങ്ങി കിടക്കുന്ന നിലയിലുള്ള പേടകത്തിന്റെ മുകളിൽ നിന്നും ബേക്കൽ കോട്ടയുടെയും ബീച്ചിന്റെയും പാർക്കിന്റെയും അതിമനോഹരമായ കാഴ്ചയാണ് ഇതിലൂടെ ആസ്വദിക്കാനാകുന്നത്. പ്രത്യേക ക്രെയിൻ വഴിയാണ് ഒരേസമയം 12 പേർക്ക് ഇരുന്ന് ഭക്ഷണം കഴിക്കാനും ചുറ്റുവട്ട കാഴ്ചകൾ ആസ്വദിക്കാനുമുള്ള സ്‌കൈ ഡൈനിംഗ് സംവിധാനം ഒരുക്കിയിരിക്കുന്നത്. ഭക്ഷണം കഴിക്കാൻ താല്പര്യമില്ലാത്തവർക്ക് 20 മിനുട്ട് നേരം കോട്ടയുടെയും കടലിന്റെയും സൗന്ദര്യവും സൂര്യാസ്തമയവും ആസ്വദിച്ച ശേഷം താഴേക്ക് മടങ്ങാം. ഭക്ഷണം ആവശ്യമുള്ളവർക്ക് 500 രൂപക്ക് പുറമെ ഭക്ഷണത്തിന്റെ തുകയും നൽകണം. ഗാർഡ് അടക്കം രണ്ടു ജീവനക്കാരും പേടകത്തിൽ ഉണ്ടാകും. ഇവർ സുരക്ഷാ കാര്യങ്ങളും ഭക്ഷണ വിതരണ കാര്യങ്ങളും നോക്കും. സുരക്ഷ ബെൽറ്റ് ഘടിപ്പിച്ച സീറ്റുകളാണ് ഇതിലുള്ളത്.

കർണ്ണാടകയിൽ പനമ്പൂർ ബീച്ചിലും ബെംഗളൂരുവിലെ സ്‌കൈ ഡൈനിംഗ് ഉണ്ടെങ്കിലും കേരളത്തിൽ ഇത് അപരിചിതമാണ്. പ്രാദേശിക വിനോദ സഞ്ചാരികൾ, വ്യത്യസ്ത അനുഭവങ്ങൾ ആഗ്രഹിക്കുന്ന സഞ്ചാരികൾ, ബോർഡ് യോഗങ്ങൾ ചേരാനുള്ള സൗകര്യമെന്ന നിലയിൽ കോർപ്പറേറ്റ് കമ്പനികളേയും ആകർഷിക്കുന്നതിനും ഇതിന് പിന്നിലുള്ളവർ ലക്ഷ്യമിടുന്നു. ജന്മദിനങ്ങൾ ആഘോഷിക്കാനും സ്‌കൈ ഡൈനിംഗ് സൗകര്യം അവസരമൊരുക്കുന്നു.

ബേക്കൽ കോട്ടയുടെ ഭംഗിയും തിരമാലകളുടെ ഓളവും ആസ്വദിച്ച് ഭക്ഷണം കഴിക്കാൻ ഒരാൾക്ക് സീറ്റിന് സീറ്റിന് 500 രൂപയാണ് നിശ്ചയിച്ചിരിക്കുന്നത്. വാർത്ത അറിഞ്ഞതോടെ സീറ്റിനായുള്ള ബുക്കിങ്ങിൽ തിരക്ക് കൂട്ടുകയാണ് ആളുകൾ. നിലവിൽ സീറ്റ് മുൻകൂട്ടി ബുക്ക് ചെയ്യുന്നവർക്ക് പ്രത്യേക ഇളവുകളും വാഗ്ദാനം ചെയ്യുന്നു. എലിവേറ്റഡ് ഡൈനിംഗ് ഓപ്ഷൻ സാഹസികതയും മികച്ച ഡൈനിംഗും സന്ദർശകർക്ക് അസാധാരണ അനുഭവമായിരിക്കും. സുരക്ഷാ കാരണങ്ങൾ മുൻനിർത്തി മഴക്കാലത്ത് ഈ സംവിധാനം ഉണ്ടാകില്ല.