ബൈക്ക് എതിരെ വന്ന കാറുമായി കൂട്ടിയിടിച്ചു; പെരുമ്പാവൂരിൽ ബൈക്ക് യാത്രികന് ദാരുണാന്ത്യം

കൊച്ചി: റോഡിലെ വളവിൽ എതിരെ വന്ന കാറുമായി കൂട്ടിയിടിച്ച് ബൈക്ക് യാത്രികന് ദാരുണാന്ത്യം. ഇന്ന് വൈകിട്ട് മൂന്നുമണിയോടെ പെരുമ്പാവൂർ കുറുപ്പംപടിയിലാണ് ബൈക്ക് കാറുമായി കൂട്ടിയിടിച്ച് അപകടമുണ്ടായത്. രായമംഗലം പുത്തൻപുരയിൽ 26 കാരനായ ജീവൻ മാർട്ടിൻ ആണ് മരിച്ചത്. പരിക്കേറ്റ സുഹൃത്തിനെ ആശുപത്രിയിൽ പ്രവേശിപ്പിച്ചു.

കുറുപ്പംപടി പീച്ചനാംമുകൾ റോഡിലെ വളവിൽ വെച്ച് എതിരെ നിന്ന് വന്ന കാറുമായി യുവാക്കൾ സഞ്ചരിച്ചിരുന്ന ബൈക്ക് കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ യുവാക്കള്‍ റോഡിലേക്ക് തെറിച്ചുവീഴുകയായിരുന്നു. ഉടനെ തന്നെ ആശുപത്രിയിലെത്തിച്ചെങ്കിലും ജീവൻ മാര്‍ട്ടിനെ രക്ഷിക്കാനായില്ല.