പ്രായപൂർത്തിയാകാത്ത പെൺകുട്ടിയെ പീഡിപ്പിച്ച 42 വയസുകാരന് ശിക്ഷ വിധിച്ച് കോടതി

കൊല്ലം: കൊല്ലത്ത് പ്രായപൂർത്തിയാകാത്ത പെൺകുട്ടിയെ ബലാത്സം​ഗം ചെയ്ത കേസിൽ പ്രതിക്ക് ശിക്ഷ വിധിച്ച് കോടതി. പത്തനംതിട്ട സീതത്തോട് ചിറ്റാർ സ്വദേശി ജെയ്‌മോന് (42) നാല് ജീവപര്യന്തവും ഒരു ലക്ഷം രൂപ പിഴയുമാണ് കോടതി വിധിച്ചത്. പുനലൂർ ഫാസ്റ്റ് ട്രാക്ക് സ്പെഷ്യൽ കോടതിയുടേതാണ് വിധി. ജീവിതാവസാനം വരെ ജീവപര്യന്തം തടവ് പ്രതി അനുഭവിക്കണമെന്ന് വിധിയിൽ പറയുന്നു.

2016ലാണ് കേസിനാസ്പദമായ സംഭവമുണ്ടായത്. അമ്മയ്‌ക്കൊപ്പം താമസിച്ചിരുന്ന പെൺകുട്ടിയെയാണ് പ്രതി ബലാത്സംഗത്തിന് ഇരയാക്കിയത്. ഇയാൾക്കെതിരെ മറ്റ് ജില്ലകളിലും ക്രിമിനൽ കേസുകൾ നിലവിലുണ്ട്. മറ്റൊരു പോക്‌സോ കേസിലും ഇയാൾ പ്രതിയാണ്. മലപ്പുറം ജില്ലയിൽ ഇയാൾക്കെതിരെ ഒരു കൊലപാതക കേസും നിലവിലുണ്ട്.