ട്രംപിൻ്റെ വ്യാപാര യുദ്ധത്തെക്കുറിച്ച് ആശങ്ക: കൂപ്പുകുത്തി ഏഷ്യൻ വിപണികൾ; ജപ്പാനിൽ 5.6% ഇടിവ്

ബാങ്കോക്ക്: അമേരിക്കൻ ഓഹരി വിപണികളിലെ നേട്ടങ്ങൾ ഒറ്റരാത്രികൊണ്ട് ഇല്ലാതായതോടെ ഏഷ്യൻ ഓഹരികൾ വെള്ളിയാഴ്ച കൂപ്പുകുത്തി. ഡോണൾഡ് ട്രംപിൻ്റെ വ്യാപാര യുദ്ധത്തെക്കുറിച്ചുള്ള ആശങ്കകൾ ശക്തമായതോടെ ജപ്പാനിലെ നിക്കി 225 സൂചിക 5.6 ശതമാനം വരെ താഴേക്ക് പതിച്ചു.

ടോക്കിയോയിൽ വ്യാപാരം തുടങ്ങിയപ്പോൾ തന്നെ 4.2 ശതമാനം ഇടിഞ്ഞ് നിക്കി 33,148.45 പോയിൻ്റിലെത്തി. അമേരിക്കൻ ഡോളറിനെതിരെ യെന്നിന്റെ മൂല്യം ഉയർന്നപ്പോൾ, യൂറോയ്‌ക്കെതിരെ അത് ഇടിഞ്ഞു. ഒരു ഡോളറിന് 143.64 ജാപ്പനീസ് യെൻ എന്ന നിലയിലാണ് വ്യാപാരം നടന്നത്. തലേന്ന് ഇത് 146 യെന്നിനടുത്തായിരുന്നു. യൂറോയുടെ മൂല്യം 1.1195 ഡോളറിൽ നിന്ന് 1.1306 ഡോളറായി ഉയർന്നു.

Also Read: അടിക്ക് തിരിച്ചടി, അമേരിക്കയിൽ ഔ‌ഡിയ്ക്ക് പൂട്ടിട്ട് ജർമ്മനി

മറ്റ് ഏഷ്യൻ വിപണികളിലും സമാനമായ സ്ഥിതിയായിരുന്നു. ദക്ഷിണ കൊറിയയുടെ കോസ്പി 1.3 ശതമാനം ഇടിഞ്ഞ് 2,413.16 ലും ഓസ്‌ട്രേലിയയിലെ എസ് & പി / എ‌എസ്‌എക്സ് 200 സൂചിക 1.2 ശതമാനം താഴ്ന്ന് 7,619.70 ലും ക്ലോസ് ചെയ്തു. ചൈനീസ് വിപണികളിൽ ഹോങ്കോങ്ങിൻ്റെ ഹാംഗ് സെങ് സൂചിക 0.4 ശതമാനം ഇടിഞ്ഞ് 20,606.04 ലും ഷാങ്ഹായ് ഓഹരി സൂചിക 0.2 ശതമാനം താഴ്ന്ന് 3,218.94 ലും എത്തി. എന്നാൽ ചൈന-അമേരിക്ക വ്യാപാര സംഘർഷം മൂർച്ഛിക്കുന്ന സാഹചര്യത്തിൽ കൂടുതൽ ഓർഡറുകൾ തായ്‌വാനിലേക്ക് വരുമെന്ന പ്രതീക്ഷയിൽ തായ്‌വാനിലെ ടൈക്‌സ് സൂചിക 1.5 ശതമാനം നേട്ടമുണ്ടാക്കി