ചങ്ങനാശേരി നഗരസഭയിൽ പ്രളയ മോക്ഡ്രിൽ സംഘടിപ്പിച്ചു

പ്രളയ പ്രതിരോധപ്രവർത്തനങ്ങളുടെ ഭാഗമായി സംസ്ഥാന ദുരന്തനിവാരണ അതോറിട്ടിയും ജില്ലാ ദുരന്ത നിവാരണ അതോറിട്ടിയും കിലയും സംയുക്തമായി ചങ്ങനാശ്ശേരി നഗരസഭയിൽ മോക്ക് ഡ്രിൽ സംഘടിപ്പിച്ചു. നഗരസഭയിലെ ബോട്ട് ജെട്ടിയുടെ സമീപ പ്രദേശങ്ങളായ 31,32 വാർഡുകളിലാണ് മോക്ക്ഡ്രിൽ പരിശീലനം നടത്തിയത്. തദ്ദേശ സ്വയംഭരണ സ്ഥാപനങ്ങളുടെ ദുരന്ത തയ്യാറെടുപ്പും കാര്യശേഷിയും വർദ്ധിപ്പിക്കുന്നതിനായി പമ്പാനദീതട ജില്ലകളിൽ റീ ബിൽഡ് കേരള -പ്രോഗ്രാം ഫോർ റിസൾട്ട്സ് പദ്ധതിയുടെ ഭാഗമായാണ് മോക്്്ഡ്രിൽ നടത്തിയത്.
ജില്ലയിലെ ചങ്ങനാശ്ശേരി നഗരസഭ, കുറിച്ചി, വാഴപ്പള്ളി, പായിപ്പാട്, തൃക്കൊടിത്താനം, മാടപ്പള്ളി, വാകത്താനം, കറുകച്ചാൽ, വാഴൂർ, വെള്ളാവൂർ പഞ്ചായത്തുകൾ എന്നീ തദ്ദേശ സ്വയം ഭരണ സ്ഥാപനങ്ങളെ ഉൾപ്പെടുത്തിയാണ് മോക്ഡ്രിൽ സംഘടിപ്പിച്ചത്. പൊലീസ്, അഗ്‌നിരക്ഷാസേന, ആരോഗ്യം, മോട്ടോർ വാഹനവകുപ്പ്, കെ.എസ്.ഇ. ബി, കെ.എസ്.ആർ.ടി.സി. എന്നീ വകുപ്പുകളുടെ ഏകോപനത്തോടെയാണ് മോക്ഡ്രിൽ നടന്നത്.
ചങ്ങനാശ്ശേരി എസ്.എച്ച്.ഒ. ബി. വിനോദ് കുമാർ ഓൺ സൈറ്റ് ഇൻസിഡന്റ് കമാൻഡറായി പ്രവർത്തിച്ചു.തുടർന്ന് നടന്ന അവലോകന യോഗത്തിൽ ചങ്ങനാശ്ശേരി നഗരസഭാ വൈസ് ചെയർപേഴ്സൺ മാത്യൂസ് ജോർജ്, തഹസിൽദാർ പി.ഡി. സുരേഷ് കുമാർ, ഫയർ ആൻഡ് റെസ്‌ക്യൂ ഓഫീസർ അനൂപ് രവീന്ദ്രൻ, എസ്.എച്ച്.ഒ. ബി. വിനോദ് കുമാർ മെഡിക്കൽ ഓഫീസർ അനീഷ ബെൻ, കില ഡി.ആർ.എം. എക്സപർട്ട് ഡോ. ആർ. രാജ്കുമാർ, ജില്ലാ ദുരന്തനിവാരണ അതോറിറ്റി ഹസാർഡ് അനലിസ്റ്റ് സുസ്മി സണ്ണി, ഡി.എം. പ്ലാൻ കോർഡിനേറ്റർ അനി തോമസ്, വിവിധ വകുപ്പുതല ഉദ്യോഗസ്ഥർ, ജനപ്രതിനിധികൾ എന്നിവർ പങ്കെടുത്തു.