ഖാദിയുടെ പ്രചാരണം സാധാരണകാർക്ക് സ്ഥിര വരുമാനം ഉറപ്പാക്കും: മന്ത്രി പി പ്രസാദ്

ഓണം ഖാദിമേളയും റെഡിമെയ്ഡ് ഗാര്‍മെന്റ്‌സ് യൂണിറ്റ് രജത ജൂബിലി ആഘോഷവും മന്ത്രി ഉദ്ഘാടനം ചെയ്തു

ഖാദിയുടെ പ്രചാരണം സാധാരണകാർക്ക് സ്ഥിര വരുമാനം ഉറപ്പാക്കുമെന്ന് കൃഷി വകുപ്പ് മന്ത്രി പി പ്രസാദ് പറഞ്ഞു.

ആലപ്പുഴ ജില്ലാ ഖാദിഗ്രാമ വ്യവസായ ഓഫീസിന്റെ ഓണം ഖാദി മേളയുടെ ജില്ലാതല ഉദ്ഘാടനവും ആലപ്പുഴ ഖാദി പ്രൊജക്ടിന് കീഴിലുള്ള റെഡിമെയ്ഡ് ഗാര്‍മെന്റ്‌സ് യൂണിറ്റിന്റെ സില്‍വര്‍ ജൂബിലി ആഘോഷത്തിൻ്റെ ഉദ്ഘാടനവും നിർവഹിച്ച് സംസാരിക്കുകയായിരുന്നു മന്ത്രി.

ഖാദിക്ക് വലിയ പാരമ്പര്യവും പൈതൃകവും ഉണ്ട്. അനീതിക്കെതിരെയുള്ള ഉല്പന്നവും
സ്വാതന്ത്ര സമരത്തിൻ്റെ ഊർജവും ആയിട്ടാണ് ഖാദി ഉയർന്ന് വന്നത്.
ഒരു ഖാദി ഉൽപ്പന്നം വാങ്ങുമ്പോൾ അതിൻ്റെ ഗുണം കർഷകർക്കും തൊഴിലാളികൾക്കും സാധാരണകാർക്കും ലഭിക്കും. അതിലൂടെ നാടിൻ്റെ പുരോഗതി സാധ്യമാകുമെന്നും മന്ത്രി പറഞ്ഞു.

ജില്ലാ ഖാദി ഗ്രാമ വ്യവസായ ഓഫീസ് അങ്കണത്തില്‍ നടന്ന ചടങ്ങില്‍
നഗരസഭാ ചെയര്‍പെഴ്‌സണ്‍ കെ കെ ജയമ്മ അധ്യക്ഷയായി.മേളയുടെ സമ്മാനക്കൂപ്പണ്‍ പ്രകാശനവും ആദ്യ വില്പനയും നഗരസഭാ അധ്യക്ഷ നിർവഹിച്ചു.

25 ാം വാര്‍ഷികത്തോടനുബന്ധിച്ച് പുറത്തിറക്കിയ ഷോര്‍ട്ട് കുര്‍ത്തിയുടെ പ്രകാശനവും തൊഴിലാളികൾക്കുള്ള ഓവർകോട്ട് വിതരണവും ഖാദി ബോർഡ് മെമ്പർ കെ ചന്ദ്രശേഖരൻ നിർവഹിച്ചു.
നഗരസഭ അംഗം കെ കെ അജേഷ് മുതിർന്ന തൊഴിലാളികളെ ആദരിച്ചു.

കേരള ഖാദി ഗ്രാമ വ്യവസായ ബോർഡ് സെക്രട്ടറി ഡോ. കെ എ രതീഷ്, ഖാദി ഡയറക്ടർ കെ വി രാജേഷ്, വില്ലേജ് ഇൻഡസ്ട്രീസ് ഡയറക്ടർ പി എ അഷിത, ജില്ലാ ഖാദി
ഗ്രാമ വ്യവസായ ഓഫീസ് പ്രോജക്ട് ഓഫീസർ പി എം ലൈല, അസി. ഇൻഫർമേഷൻ ഓഫീസർ പി എസ് സജിമോൻ, സി സിലീഷ്, റാഷിദ ബഷീർ,പവിത്രൻ, എസ് പാർവതി
എന്നിവർ സംസാരിച്ചു .

‘എനിക്കും വേണം ഖാദി’ എന്ന സന്ദേശം ജനങ്ങളിലേക്ക് എത്തിച്ചുകൊണ്ട് ഖാദിയെ കൂടുതൽ ജനപ്രിയമാക്കുവാൻ വൈവിധ്യമാർന്ന കോട്ടൺ, സിൽക്ക്, ലിനൻ ഖാദി വസ്ത്രങ്ങളുടെ വമ്പിച്ച ശേഖരവും ആകർഷകമായ സമ്മാന പദ്ധതികളും ഓണത്തിൻറെ ഭാഗമായി ഖാദി വില്പന ശാലകളിൽ സജ്ജമാക്കിയിട്ടുണ്ട് മില്ലേനി ബ്രാന്‍ഡ് ഖാദി ഷര്‍ട്ടുകളുടെ മേളയും ഇതോടനുബന്ധിച്ച് സംഘടിപ്പിക്കുന്നുണ്ട്.
ഓണത്തോടനുബന്ധിച്ചു ആഗസ്റ്റ് ഒന്ന് മുതല്‍ സെപ്റ്റംബർ നാല് വരെ ഖാദി തുണിത്തരങ്ങൾക്ക് സർക്കാർ റിബേറ്റ് അനുവദിച്ചിട്ടുണ്ട്