കോഴിക്കോട് ഫ്രിഡ്ജ് പൊട്ടിത്തെറിച്ചു; കുടുംബം രക്ഷപ്പെട്ടത് തലനാരിഴയ്ക്ക്

കോഴിക്കോട്: ഉള്ള്യേരിയിലെ ഒളളൂരിൽ ഫ്രിഡ്ജ് പൊട്ടിത്തെറിച്ചുണ്ടായ അപകടത്തിൽ നിന്ന് ഒരു കുടുംബം രക്ഷപ്പെട്ടത് തലനാരിഴയ്ക്ക്. വടക്കേകുന്നുമ്മൽ വാസുവിന്റെ വീട്ടിലെ ഫ്രിഡ്ജാണ് വൻ സ്ഫോടന ശബ്ദത്തോടെ പൊട്ടിത്തെറിച്ചത്. ഫ്രിഡ്ജ് പൂർണ്ണമായി കത്തിക്കരിഞ്ഞ് വെറും തകരപ്പാത്രമായി മാറി. പുറത്തുവന്ന ചിത്രങ്ങൾ അപകടത്തിൻ്റെ ഭീകരത വിളിച്ചോതുന്നതാണ്. കഴിഞ്ഞ ദിവസമാണ് സംഭവം നടന്നത്. അടുക്കളയിൽ സ്ഥാപിച്ചിരുന്ന ഫ്രിഡ്ജ് വലിയ ശബ്ദത്തോടെ പൊട്ടിത്തെറിക്കുകയും തുടർന്ന് തീ പടരുകയുമായിരുന്നു.

പകൽ സമയത്തായതുകൊണ്ട് മാത്രമാണ് കുടുംബാംഗങ്ങൾക്കെല്ലാം രക്ഷപ്പെടാൻ കഴിഞ്ഞത്. തീപിടിത്തത്തിൽ ഫ്രിഡ്ജ് പൂർണ്ണമായും നശിച്ചു. ഫ്രിഡ്ജിന് സമീപമുണ്ടായിരുന്ന മറ്റ് വൈദ്യുതോപകരണങ്ങൾക്കും കേടുപാടുകൾ സംഭവിച്ചു. അടുക്കളയിലെ സാധനങ്ങളും ജനൽച്ചില്ലുകളും തകർന്നു. കൊയിലാണ്ടിയിൽ നിന്നെത്തിയ അഗ്നിരക്ഷാ സേനാംഗങ്ങൾ ഏറെ പ്രയാസപ്പെട്ടാണ് തീ പൂർണ്ണമായും അണച്ചത്.