കുടുംബകലഹം: ഭാര്യയെയും രണ്ട് പിഞ്ചു പെൺമക്കളെയും ശ്വാസംമുട്ടിച്ച് കൊന്ന ഭർത്താവ് പിടിയിൽ

സന്തോഷത്തിന്റെ രക്ഷാബന്ധൻ സമയത്ത് രാജ്യതലസ്ഥാനത്ത് നിന്ന് വരുന്നത് ഞെട്ടിക്കുന്ന കൊലപാതകവാർത്തയാണ്. ഡൽഹിയിലെ കരാവൽ നഗറിൽ സ്വന്തം ഭാര്യയെയും രണ്ട് പിഞ്ചു പെൺമക്കളെയും ശ്വാസംമുട്ടിച്ച് കൊലപ്പെടുത്തിയ കേസിൽ ഭർത്താവ് പിടിയിലായി. ഒളിവിൽ പോയ ഇയാളെ പിന്നീട് പോലീസ് അറസ്റ്റ് ചെയ്യുകയായിരുന്നു. സ്വന്തം ജീവനൊടുക്കാൻ ഇയാൾ ശ്രമിച്ചതായും സംശയമുണ്ട്.

പോലീസ് പറയുന്നതനുസരിച്ച്, ഭാര്യാഭർത്താക്കന്മാർ തമ്മിലുണ്ടായ ഒരു കുടുംബകലഹമാണ് ഈ ദാരുണമായ കൊലപാതകങ്ങൾക്ക് കാരണം. നോർത്ത് ഈസ്റ്റ് ഡൽഹിയിലെ കരാവൽ നഗറിലെ ഷഹീദ് ഭഗത് സിംഗ് കോളനിയിൽ ശനിയാഴ്ച രാവിലെ ഏഴു മണിയോടെയാണ് സംഭവം. 33 വയസ്സുകാരനായ പ്രദീപ് കുമാർ തൻ്റെ ഭാര്യ ജയശ്രീയെയും അഞ്ച്, എട്ട് വയസ്സുള്ള രണ്ട് പെൺമക്കളെയും കൊലപ്പെടുത്തുകയായിരുന്നു.

ടൈംസ് ഓഫ് ഇന്ത്യയുടെ റിപ്പോർട്ട് അനുസരിച്ച്, ഭാര്യയോട് തനിക്ക് അതിയായ ദേഷ്യമുണ്ടായിരുന്നുവെന്ന് പ്രതിയായ പ്രദീപ് കുമാർ പോലീസിനോട് സമ്മതിച്ചു. രക്ഷാബന്ധൻ ദിനത്തിൽ ഭാര്യ സ്വന്തം വീട്ടിലേക്ക് പോകണമെന്ന് നിർബന്ധിച്ചതിനെച്ചൊല്ലി ഇരുവരും തമ്മിൽ തർക്കമുണ്ടായതായി റിപ്പോർട്ടിൽ പറയുന്നു.

കുടുംബത്തെ കൊലപ്പെടുത്തിയ ശേഷം പ്രദീപ് കുമാർ സംഭവസ്ഥലത്തുനിന്ന് ഓടി രക്ഷപ്പെട്ടു. എന്നാൽ, പോലീസ് നടത്തിയ ഊർജ്ജിതമായ തിരച്ചിലിനൊടുവിൽ സിസിടിവി ദൃശ്യങ്ങളും മറ്റ് നിരീക്ഷണങ്ങളും വഴി ഇയാളെ മുകുന്ദ് വിഹാറിൽ നിന്ന് കണ്ടെത്തുകയും അറസ്റ്റ് ചെയ്യുകയും ചെയ്തു.

ചൂതാട്ടവും വരുമാനക്കുറവും കാരണം താൻ വലിയ കടക്കെണിയിലായിരുന്നെന്നും, കുടുംബകലഹങ്ങൾ വർധിച്ചതോടെയാണ് കുടുംബത്തെ ശ്വാസംമുട്ടിച്ച് കൊലപ്പെടുത്തിയതെന്നും കുമാർ പോലീസിന് മൊഴി നൽകി.