അവിടെ പോയി വെറുതെ ഇരിക്കുന്നതിലും നല്ലത് വീട്ടിലിരുന്ന് കുട്ടികൾക്കൊപ്പം സമയം ചെലവഴിക്കുന്നതല്ലേ എന്ന് ചിന്തിച്ചു; വിരമിക്കലിനെക്കുറിച്ച് തുറന്നുപറഞ്ഞ് പ്രമുഖ താരം

കഴിഞ്ഞ എട്ട് മാസത്തിനിടെ ഇന്ത്യൻ ക്രിക്കറ്റിലെ പല പ്രമുഖരും അന്താരാഷ്ട്ര ക്രിക്കറ്റിൽ നിന്ന് വിരമിച്ചത് ക്രിക്കറ്റ് ലോകത്ത് വലിയ ചർച്ചയായിരുന്നു. ഈ പട്ടികയിൽ അവസാനമായി ഇടം നേടിയത് രവിചന്ദ്രൻ അശ്വിനാണ്. കഴിഞ്ഞ വർഷം ഗാബ ടെസ്റ്റിൽ ഇന്ത്യ സമനില നേടിയതിന് പിന്നാലെയാണ് താൻ അന്താരാഷ്ട്ര ക്രിക്കറ്റിൽ നിന്ന് വിരമിക്കുന്നുവെന്ന് അശ്വിൻ പ്രഖ്യാപിച്ചത്. ഇപ്പോൾ തന്റെ വിരമിക്കൽ തീരുമാനത്തിന് പിന്നിലെ കാരണം വെളിപ്പെടുത്തിയിരിക്കുകയാണ് അദ്ദേഹം.

തന്റെ യൂട്യൂബ് ചാനലിൽ മുൻ ഇന്ത്യൻ പരിശീലകൻ രാഹുൽ ദ്രാവിഡുമായി സംസാരിക്കവെയാണ് അശ്വിൻ വികാരഭരിതനായത്. വിദേശ പര്യടനങ്ങളിൽ ടെസ്റ്റ് മത്സരങ്ങളിൽ നിന്ന് പുറത്തിരിക്കേണ്ടി വന്നതാണ് തന്നെ ഈ തീരുമാനമെടുക്കാൻ പ്രേരിപ്പിച്ചത് എന്ന് അശ്വിൻ പറഞ്ഞു.

“എനിക്ക് പ്രായമായി, ഞാൻ അത് സമ്മതിക്കുന്നു. പക്ഷേ വിദേശ പര്യടനങ്ങൾക്ക് പോയി, കൂടുതൽ സമയം വെറുതെ ഇരിക്കേണ്ടി വരുന്നത് എനിക്ക് മാനസികമായി ബുദ്ധിമുട്ടായിരുന്നു,” അശ്വിൻ പറഞ്ഞു.

“ടീമിന് വേണ്ടി കളിക്കാൻ ആഗ്രഹമില്ലാഞ്ഞിട്ടല്ല, എന്നാൽ വീട്ടിലിരുന്ന് കുട്ടികൾക്കൊപ്പം സമയം ചെലവഴിക്കുന്നതല്ലേ ഇതിലും നല്ലത് എന്ന് ഞാൻ ചിന്തിച്ചു. അവരും വളർന്നുവരികയാണ്. എനിക്കിപ്പോൾ കളിക്കാൻ കഴിയുന്നില്ലെങ്കിൽ ഞാൻ ഇവിടെ എന്താണ് ചെയ്യുന്നത്? 34-35 വയസ്സിൽ വിരമിക്കണമെന്ന് ഞാൻ പണ്ടേ തീരുമാനിച്ചിരുന്നു. പക്ഷേ അതിനിടയിൽ എനിക്ക് അധികം കളിക്കാൻ കഴിഞ്ഞില്ല എന്നതാണ് സത്യം,” അശ്വിൻ കൂട്ടിച്ചേർത്തു.

അനിൽ കുംബ്ലെയ്ക്ക് ശേഷം ടെസ്റ്റ് ക്രിക്കറ്റിൽ 500 വിക്കറ്റുകൾ നേടുന്ന രണ്ടാമത്തെ ഇന്ത്യൻ ബൗളറാണ് രവിചന്ദ്രൻ അശ്വിൻ. 2011-ൽ ടെസ്റ്റ് അരങ്ങേറ്റം കുറിച്ച അദ്ദേഹം, ഇന്ത്യയിൽ 65 ടെസ്റ്റുകളിൽ നിന്ന് 383 വിക്കറ്റുകളും വിദേശത്ത് 40 മത്സരങ്ങളിൽ നിന്ന് 150 വിക്കറ്റുകളും നേടി.

കഴിഞ്ഞ വർഷം ഡിസംബറിൽ അന്താരാഷ്ട്ര ക്രിക്കറ്റിൽ നിന്ന് വിരമിച്ച അശ്വിൻ, ഐപിഎൽ, ടിഎൻപിഎൽ തുടങ്ങിയ ടൂർണമെന്റുകളിൽ കളിക്കുന്നത് തുടരുമെന്നും ക്രിക്കറ്റുമായി ബന്ധപ്പെട്ട് പ്രവർത്തിക്കുമെന്നും അറിയിച്ചു.