അഴിമതിക്കേസുകളിൽ വിട്ടുവീഴ്ച പാടില്ലെന്ന് ഹൈക്കോടതി

കൊച്ചി: അഴിമതിക്കേസുകളിൽ വിട്ടുവീഴ്ച പാടില്ലെന്ന് ഹൈക്കോടതി. അഴിമതിക്കേസുകളിലെ പ്രതികളോട് ഉദാര സമീപനം പാടില്ലെന്നും, വിചാരണാ കോടതികള്‍ ഇക്കാര്യം ഉറപ്പാക്കണമെന്നും കോടതി ഉത്തരവിട്ടു.

അഴിമതി രാജ്യപുരോഗതിയെ തടയുന്ന സാമൂഹിക വിപത്താണെന്നും, പൗരന്മാരുടെ യഥാർത്ഥ അവകാശങ്ങളെ ഹനിക്കുമെന്നും ജസ്റ്റിസ് എ. ബദറുദ്ധീൻ വ്യക്തമാക്കി. വ്യാജ മെഡിക്കല്‍ പിജി സര്‍ട്ടിഫിക്കറ്റ് കേസില്‍ വനിതാ ഡോക്ടര്‍ക്ക് മുന്‍കൂര്‍ ജാമ്യം നിഷേധിച്ചാണ് കോടതിയുടെ നിരീക്ഷണം.

കരുനാഗപ്പള്ളി താലൂക്ക് ആശുപത്രിയിൽ പ്രാക്ടീസ് ചെയ്ത ഡോ. ടി.എസ് സീമയുടെ അറസ്റ്റും കസ്റ്റഡിയില്‍ ചോദ്യം ചെയ്യലും അനിവാര്യമാണെന്നും ഗുരുതര സ്വഭാവമുള്ള കേസായതിനാല്‍ മുൻകൂർ ജാമ്യം അനുവദിക്കാനാകില്ലെന്നും കോടതി പറഞ്ഞു.