അടച്ചിട്ട വീട് കുത്തിത്തുറന്ന് മോഷണം; 35 പവന്‍ സ്വര്‍ണം നഷ്ടപ്പെട്ടു

തൃശൂര്‍: പന്നിത്തടം എയ്യാലില്‍ അടച്ചിട്ട വീട് കുത്തിത്തുറന്ന് മോഷണം. കവര്‍ന്നു. എയ്യാല്‍ ചുങ്കം സെന്ററിന് സമീപം താമസിക്കുന്ന ഒറുവില്‍ അംജതിന്റെ വീട്ടിൽ നിന്നാണ് 35 പവന്‍ സ്വര്‍ണം മോഷണം പോയത്. പാലക്കാട് കഞ്ചിക്കോടുള്ള സ്വകാര്യ സ്ഥാപനത്തില്‍ ജോലിക്കാരനാണ് അംജത്. ജോലി സ്ഥലത്താണ് അംജത് താമസിക്കുന്നത്. വീട്ടിലുണ്ടായിരുന്ന ഭാര്യ ഫാദിയ, മാതാവ് നഫീസ എന്നിവര്‍ കഴിഞ്ഞ തിങ്കളാഴ്ച ബന്ധുവീടുകളിലേക്ക് പോയതായിരുന്നു. തിരിച്ചെത്തിയപ്പോഴാണ് മോഷണം നടന്ന വിവരം മനസിലാക്കിയത്. കുന്നംകുളം എ.സി.പി. സി.ആര്‍. സന്തോഷ്, എരുമപ്പെട്ടി ഇന്‍സ്‌പെക്ടര്‍ ജെ.എസ്. അശ്വിനി, എസ്.ഐ. കെ.വി. ജോണി എന്നിവരുടെ നേതൃത്വത്തില്‍ പൊലീസ് സ്ഥലത്തെത്തി അന്വേഷണം ആരംഭിച്ചു.