പഹൽഗാമിൽ കൊല്ലപ്പെട്ട വിനയ് നർവാളിന്റെ കുടുംബത്തിന് 50 ലക്ഷം രൂപ ധനസഹായം

പഹൽഗാം ഭീകരാക്രമണത്തിൽ കൊല്ലപ്പെട്ട കൊച്ചിയിലെ നാവികസേന ഉദ്യോഗസ്ഥനായിരുന്ന വിനയ് നർവാളിന്റെ കുടുംബത്തിന് സഹായം പ്രഖ്യാപിച്ച് ഹരിയാന സർക്കാർ. 50 ലക്ഷം രൂപ ധനസഹായവും കുടുംബത്തിൽ ഒരാൾക്ക് സർക്കാർ ജോലിയും പ്രഖ്യാപിച്ചിട്ടുണ്ട്. ഈ സർക്കാർ ജോലി ആർക്ക് നൽകണമെന്ന് കാര്യത്തിൽ വിനയ് നർവാളിന്റെ മാതാപിതാക്കൾക്ക് തീരുമാനമെടുക്കാമെന്നും മുഖ്യമന്ത്രി നയബ് സിംഗ് സൈനി വ്യക്തമാക്കി.

കൊച്ചിയിൽ ദക്ഷിണ നാവികസേന ആസ്ഥാനത്തായിരുന്നു ഹരിയാനയിലെ കർനാൽ സ്വദേശിയായിരുന്ന വിനയ് ജോലി ചെയ്തിരുന്നത്. ഏപ്രിൽ 16നായിരുന്നു വിനയുടെ വിവാഹം. ഹണിമൂണിനായാണ് ഏപ്രിൽ 22ന് ജമ്മു കാശ്മീരിലെത്തിയത്. ഭീകരർ വെടിവെച്ച് കൊലപ്പെടുത്തിയ 26 പേരിൽ ഒരാളായിരുന്നു 26 വയസ്സ് മാത്രം പ്രായമുള്ള വിനയ്.

മരിച്ചുകിടക്കുന്ന വിനയുടെ മൃതദേഹത്തിന് അരികിൽ ഹൃദയം പൊട്ടി നിൽക്കുന്ന ഭാര്യ ഹിമാൻഷിയുടെ ചിത്രം ലോകമാകെ പ്രചരിച്ചിരുന്നു. സംസ്ഥാന സർക്കാർ പ്രഖ്യാപിച്ച ധനസഹായം, സർക്കാർ ജോലി എന്നിവ ഹിമാൻഷിക്ക് നൽകുന്നതിൽ തീരുമാനമെടുക്കാനുള്ള അവകാശം വിനയുടെ മാതാപിതാക്കൾക്കായിരിക്കും.