ഡോണൾഡ് ട്രംപിന്റെ ആരോഗ്യവിവരങ്ങൾ പുറത്ത് വിട്ട് വൈറ്റ്ഹൗസ്

അമേരിക്കൻ പ്രസിഡന്റ് ഡോണൾഡ് ട്രംപിന്റെ ആരോഗ്യ സംബന്ധമായ വിവരങ്ങൾ പുറത്തുവിട്ട് വൈറ്റ്ഹൗസ്. 78 കാരനായ ട്രംപിന് മറ്റ് ആരോഗ്യ പ്രശ്നങ്ങൾ ഇല്ലെന്നും ധാരാണാശേഷിയും ശാരീരിക ആരോഗ്യവും മികച്ചരീതിയിലാണ് പോകുന്നതെന്നും അദ്ദേഹത്തിന്റെ ഡോക്ടർ ഷോൺ ബാബബെല്ല അറിയിച്ചു. ഞായറാഴ്ച വൈറ്റ് ഹൗസ് പുറത്തുവിട്ട മെമോയിലൂടെയാണ് ഡോക്ടർ ഇക്കാര്യം വെളിപ്പെടുത്തിയത്. പരിശോധനകളുടെ അടിസ്ഥാനത്തിൽ ഹൃദയ, ശ്വാസകോശ,നാഡീവ്യൂഹ പ്രവർത്തനങ്ങൾക്ക് യാതൊരു പ്രശ്നവുമില്ല.

5 മണിക്കൂർ നീണ്ടു നിന്ന് പരിശോധനയിലൂടെയാണ് ട്രംപിന്റെ ആരോഗ്യത്തെപ്പറ്റി പൂർണമായ വിവരങ്ങൾ വിദഗ്ധർ മനസിലാക്കിയത്. രക്തപരിശോധനകളും, ഹൃദയാരോഗ്യ ചെക്കപ്പുകളും, അൾട്രാസൗണ്ട് ടെസ്റ്റും നടത്തി. ട്രംപ് പൂർണ ആരോഗ്യവാനാണെന്നും കമാൻഡർ ഇൻ ചീഫ്, ഹെഡ് ഓഫ് സ്റ്റേറ്റ് പദവികളിലെ കൃത്യനിർവഹണത്തിന് യാതൊരു തടസ്സവും വരില്ലെന്നും ഡോക്ടർ പറയുന്നു. മാനസിക സമ്മർദ്ദമോ. വിഷാദമോ പോലുള്ള യാതൊരു പ്രശ്നങ്ങളുമില്ലെന്നും മെമോയിൽ സൂചിപ്പിക്കുന്നു.

75 പിന്നിട്ടതിനാൽ ട്രംപിന് മോൻഡിയൽ കൊഗ്നിറ്റീവ് അസെസ്മെന്റ് നടത്തിയിരുന്നു. മറവിരോഗം ഉണ്ടോയെന്ന് കണ്ടെത്താനുള്ള പരിശോധനയാണിത്. ഇതിൽ മൃഗങ്ങളുടെ പേരുകൾ, ക്ലോക്കിന്റെ ചിത്രം വരയ്ക്കുക, അഞ്ച് മിനിറ്റിനു ശേഷം വാക്കുകൾ ആവർത്തിക്കുക തുടങ്ങിയ പ്രവർത്തികളാണ് ചെയ്യേണ്ടത്. ഈ ടെസ്റ്റിൽ ട്രംപിന് 30ൽ 30 മാർക്കും കിട്ടി. നിലവിൽ കൊളസ്ട്രോൾ നിയന്ത്രിക്കാനുള്ള മരുന്നുകൾ, ഹൃദ്രോഗം തടയാൻ ആസ്പിരിൻ, ചർമരോഗത്തിനുള്ള മരുന്ന് എന്നിവയാണ് ഉപയോഗിച്ചുവരുന്നതെന്നും മെമോയിൽ പറയുന്നു.

ആറടി മൂന്ന് ഇഞ്ച് ഉയരമുള്ള ട്രംപിന് 101 കിലോ ഭാരമാണുള്ളത്. 2019 ൽ ഉണ്ടായിരുന്നതിനെക്കാൾ ഭാരം കുറഞ്ഞതായാണ് റിപ്പോർട്ട് പറയുന്നത്. കഴിഞ്ഞ വർഷം ട്രംപിനെതിരെ നടന്ന വധശ്രമത്തിന്റെ ഭാഗമായി വലത് ചെവിയുടെ മുകളിൽ വെടിയുണ്ടയുടെ മുറിപ്പാട് ഉണ്ട്. മറ്റ് ആരോഗ്യ പ്രശ്നങ്ങളില്ല. ജീവിതശൈലിയിൽ മാറ്റം വരുത്താനും ഡോക്ടർമാർ നിർദേശിച്ചു. തനിക്കു നേരെയുള്ള വധശ്രമത്തിനു ശേഷം ആദ്യമായാണ് ട്രംപ് സ്വന്തം ആരോഗ്യ വിവരങ്ങൾ പുറത്തു വിടുന്നത്.