ചെന്നൈ എഗ്മോർ എക്സ്പ്രസിൽ അഞ്ഞൂറിന്റെ നോട്ടുകെട്ടുകൾ; കണ്ടെത്തിയത് ശരീരത്തിൽ കെട്ടിവച്ച നിലയിൽ

കൊല്ലം: കൊല്ലം ജില്ലയിലെ പുനലൂരിൽ രേഖകളില്ലാതെ ട്രെയിനിൽ കടത്താൻ ശ്രമിച്ച പതിനാറര ലക്ഷം രൂപ പിടികൂടി. ചെന്നൈ എഗ്മോർ എക്സ്പ്രസിലാണ് മധുര സ്വദേശി നവനീത് കൃഷ്ണൻ എന്നയാൾ പണം എത്തിച്ചത്. സംശയം തോന്നിയതിന്റെ അടിസ്ഥാനത്തിൽ ആര്‍പിഎഫും റെയിൽവേ പൊലീസും നടത്തിയ പരിശോധനയിൽ ആണ് ശരീരത്തിൽ തുണികൊണ്ട് കെട്ടി ഒളിപ്പിച്ച പണം കണ്ടെത്തിയത്. ഇയാൾ മുൻപും ട്രെയിനിൽ പണം കടത്തിയിട്ടുണ്ടെന്നാണ് നിഗമനം. ആറുമാസത്തിനിടെ രേഖകളില്ലാതെ കടത്തിയ ഒരു കോടി 38 ലക്ഷം രൂപയാണ് പുനലൂർ റെയിൽവേ പൊലീസ് പിടികൂടിയത്.