ലോകത്തിലെ ഏറ്റവും ഉയരമുള്ള പാലത്തി​ന്റെ നിർമ്മാണം അവസാന ഘട്ടത്തിൽ

ബീജിങ്: ചൈനയുടെ പുതിയ വിസ്മയം ഹുവാജിയാങ് ഗ്രാൻഡ് കാന്യൺ പാലത്തി​ന്റെ നിർമ്മാണം അവസാന ഘട്ടത്തിൽ. ജൂണിൽ പാലം തുറന്നുകൊടുക്കുമെന്നാണ് റിപ്പോർട്ട്. മലയിടുക്കിന് കുറുകെ 2.8 കിലോമീറ്റർ നീളത്തിലുള്ള കൂറ്റൻ പാലം ലോകത്തെ ഏറ്റവും ഉയരത്തിൽ സ്ഥിതി ചെയ്യുന്ന പാലമെന്ന റെക്കോർഡ് സ്വന്തമാക്കും. 216 ദശലക്ഷം പൗണ്ട് (2400 കോടി രൂപ) ചെലവ് വരുന്ന ഈ പദ്ധതി യാത്രാ സമയം ഒരു മണിക്കൂറിൽ നിന്ന് ഒരു മിനിറ്റായി കുറക്കുമെന്നാണ് പ്രധാന നേട്ടം. ഹുവാജിയാങ് ഗ്രാൻഡ് കാന്യൺ പാലത്തിന് ഈഫൽ ടവറിനേക്കാൾ 200 മീറ്ററിലധികം ഉയരവും മൂന്നിരട്ടി ഭാരവുമുണ്ടെന്നാണ് റിപ്പോർട്ടുകൾ പറയുന്നത്.

പാലത്തിന്റെ സ്റ്റീൽ ട്രസ്സുകൾക്ക് ഏകദേശം 22,000 മെട്രിക് ടൺ ഭാരമുണ്ട്. മൂന്ന് ഐഫൽ ടവറുകൾക്ക് തുല്യമാണ് ഈ ഭാരം. വെറും രണ്ട് മാസത്തിനുള്ളിലാണ് പാലം നിർമിച്ചതെന്ന പ്രത്യേകതയുണ്ട്. ചീഫ് എഞ്ചിനീയർ ലി ഷാവോയാണ് നിർമാണത്തിന് മേൽനോട്ടം വഹിച്ചത്.

ചൈനയിലെഗ്രാമപ്രദേശങ്ങളെ ബന്ധിപ്പിക്കുന്നതോടൊപ്പം വിനോദസഞ്ചാര ആകർഷണവും പാലത്തിന്റെ ലക്ഷ്യമാണ്. വിശ്രമകേന്ദ്രങ്ങൾ, ഗ്ലാസ് വാക്ക്‌വേ, ലോകത്തിലെ ഏറ്റവും ഉയരം കൂടിയ ബംഗീ ജമ്പ് എന്നിവയും പാലത്തിൽ തയ്യാറാക്കും. 2016 ൽ, ചൈനയിലെ ഏറ്റവും ഉയരം കൂടിയ പാലം (1,854 അടി) ബെയ്പാൻജിയാങ്ങിൽ നിർമ്മിച്ചിരുന്നു.