18 കാരനെ തട്ടിക്കൊണ്ടുപോയി മർദ്ദിച്ചു ; മൂന്നുപേർ അറസ്റ്റിൽ

പോത്തൻകോട്: 18 കാരനെ ആക്രമിച്ച് തട്ടിക്കൊണ്ടുപോയ സംഭവത്തിൽ മൂന്ന് പേർ അറസ്റ്റിൽ.
കൊയ്ത്തൂർക്കോണം യാസിൻ (21), സഹോദരൻ ഷമീർ(29), സാജിത് (19) എന്നിവരെയാണ് മംഗലപുരം പൊലീസ് പിടികൂടിയത്.

മേലെതോന്നയ്ക്കൽ ബിലാൽ (18) നെയാണ് ഇവർ മർദ്ദിച്ചത്. കഴിഞ്ഞ വ്യാഴാഴ്ച രാത്രിയായിരുന്നു സംഭവം നടന്നത്.സ്കൂട്ടറിൽ വരികയായിരുന്ന ബിലാലിനെ വഴിയിൽ തടഞ്ഞുനിറുത്തി മാരകായുധങ്ങൾ കാട്ടി ഭീഷണിപ്പെടുത്തി അജ്മൽ എവിടെ എന്ന് ചോദിച്ച് അസഭ്യം പറയുകയും കാറിൽ കയറ്റിക്കൊണ്ടുപോയി മർദ്ദിക്കുകയുമായിരുന്നു.

കാറിൽ നിന്ന് രക്ഷപ്പെട്ട് വീട്ടിലെത്തിയ ബിലാലിനെ മൂന്നംഗസംഘം വീട്ടിലെത്തിയും അസഭ്യം പറഞ്ഞു. തുടർന്ന് അന്നേദിവസം രാത്രി പതിനൊന്നരയോടെ കബറടിയിൽ എത്തിയ അക്രമിസംഘം ബിലാലിന്റെ സുഹൃത്ത് അജ്മലിനെ വെട്ടിപ്പരിക്കേൽപ്പിച്ച ശേഷം ഒളിവിൽ പോവുകയായിരുന്നു.