റോബോട്ടിക് ശസ്ത്രക്രിയയിൽ അഭൂത നേട്ടം സ്വന്തമാക്കി കുവൈത്ത്

കുവൈത്ത് സിറ്റി: തുടർച്ചയായി അഞ്ച് വിദൂര റോബോട്ടിക് ശസ്ത്രക്രിയകൾ വിജയകരമായി പൂർത്തിയാക്കി അഭൂതപൂർവമായ വൈദ്യശാസ്ത്ര നേട്ടം സ്വന്തമാക്കി കുവൈത്ത് ആരോഗ്യ മന്ത്രാലയം. 7,000 കിലോമീറ്ററിലധികം ദൂരത്തിൽ നിന്ന് രാജ്യത്തുടനീളമുള്ള മെഡിക്കൽ വിദഗ്ധരുടെ നേരിട്ടുള്ള പങ്കാളിത്തത്തോടെയാണ് ടെലി റോബോട്ടിക് ശസ്ത്രക്രിയാ സാങ്കേതികവിദ്യ ഉപയോഗിച്ചുള്ള ഈ ഓപ്പറേഷൻ നടത്തിയത്. ചൈനയിലെ ഷാങ്ഹായിൽ ഇരുന്നു കൊണ്ട് കുവൈത്തി ശസ്ത്രക്രിയാ വിദഗ്ധൻ ഡോ. സാദ് അൽ ദോസാരി അത്യാധുനിക മെഡ്‌ബോട്ട് എന്ന ശസ്ത്രക്രിയാ റോബോട്ട് ഉപയോഗിച്ചാണ് കുവൈത്തിലെ സബാഹ് അൽ അഹമ്മദ് സെന്ററിലായിരുന്ന രോഗികളുടെ ശസ്ത്രക്രിയകൾ നടത്തിയത്.

വൃക്ക, പ്രോസ്റ്റേറ്റ് കാൻസർ ബാധിച്ച അഞ്ച് രോഗികൾക്കാണ് ശസ്ത്രക്രിയത നടത്തിയതെന്ന് മന്ത്രാലയം അറിയിച്ചു. ഈ നേട്ടത്തിലൂടെ ഒരു പുതിയ ലോക റെക്കോർഡാണ് കുവൈത്ത് സ്വന്തമാക്കിയത്. ചുരുങ്ങിയ സമയത്തിനുള്ളിൽ ഏറ്റവും കൂടുതല്‍ വിദൂര റോബോട്ടിക് ശസ്ത്രക്രിയകൾ നടത്തിയെന്ന നേട്ടമാണ് കുവൈത്ത് സ്വന്തമാക്കിയത്.